Mas y mas critica ta yegando na redaccion di Bon Dia Aruba di personanan cu a solicita riba e website disponible di e proyecto FASE, pero cu no a haya contesta, y por lo tanto tampoco pago di e prome suma di apoyo di e proyecto.

Di banda di e proyecto y e ministro responsable a duna di conoce cu un gran parti di esnan cu a solicita, tin problema di diferente tipo cu ta stroba nan yega na un conclusion final den e comision cu ta atende e casonan. Ta menciona por ehemplo cu den hopi caso no a entrega tur documento y cu esaki ta un requisito indispensable pa por haya e subsidio. Tambe ta mustra riba e hecho cu e confirmacion cu un persona haya cu ta bisa cu e ta registra, no ta implica automaticamente cu tur cos ta na orden y cu e proximo paso lo ta e otorgamento di e subsidio.

Hasta si tur documento ta presente, y e comision di evaluacion ta aproba e solicitud, ainda mester tuma lugar e proceso di aprobacion, unda tur e instancianan involucra den e control, esta SVb y departamento di Asunto Social, y finalmente departamento di Finanzas pa haci e pago riba e cuenta di banco referi.

Di parti di coordinadora di e proyecto, sra. Sabine de Groot, redaccion a bin comprende cu no ta asina cu tur caso a keda trata; tin hopi den proceso ainda cu, segun nan keda aproba, lo haya nan pago via nan cuenta di banco den e simannan venidero.

Telefon.
Varios persona a duna di conoce tambe cu nan a purba yama e number di telefon 2800707 pa por comunica cu un persona cu ta atende e peticionarionan, pero cu ta casi imposible pa haya contacto di e manera aki.

Redaccion di Bon Dia Aruba a haya pa mira e documentacion di varios caso cu a entrega, por lo visto, tur documento requeri y a haya confirmacion via e website cu nan peticion a keda acepta. Naturalmente nos no por mira kico por tabata un obstaculo mas leu den e proceso, den e control por ehemplo di e dunador di trabao na SVb. Den e casonan aki ta trata di hende cu no a tende nada pero tampoco a haya placa riba nan cuenta bancario te ayera, 4 di mei.

Nota di redaccion:
Un di e preguntanan cu nos tin como Bon Dia Aruba, ta si tur hende ta haya algun comunicacion ainda di banda di e proyecto FASE. En principio tur peticion haci na gobierno mester haya un contesta dentro di e termino indica pa esaki. Segun nos opinion esnan cu a haci un peticion via e proceso aki, tin derecho riba un contesta, tambe den caso di un contesta negativo, pasobra, manera tur peticion na gobierno, e negacion aki ta habri caminda pa nan apela nan caso den cuadro di ley LAR, cu mester keda trata segun e procedimento stipula den e ley menciona. Si dentro di e periodo stipula pa LAR, no a haya contesta, ta habri e posibilidad pa apela e decision ficticio, e asina yama ‘fictieve weigering’.