Recientemente den e siman cu a pasa so tabata tin dos caso caminda nos matutino a trece dilanti informacion di abuso contra hende muhe. Den cuadro cu esaki, Bon Dia a sinta cu presidente di Fundacion Pa Hende Muhe Den Dificultad Sra. Suzy Kock y coordinador Sra. Magaly Maduro pa asina repasa e criterio y puntonan cu ta rekeri pa bo haya ayudo for di e fundacion y un luga den nan cas di refugio.
Segun presidente di FHMDD, Sra. Suzy Kock ta splica Bon Dia, ni mas cu nan kier yuda tur hende nan no por djis tuma ken cu ta pa motibo cu nan personal no ta ‘opgeleid’ den cierto aspectonan por ehempel riba e parti psikiatrico y no por guia e personanan aki den nan necesidad special. Sinembargo, Sra. Kock ta agrega cu esey no kiermen cu FHMDD ta gewoon nenga nan y manda nan un otro caminda sin yuda nan. ”Nos ta purba di guia nan si na unda nan mester bay y mustra nan e caminda cu nan tin cu cana. Esey tambe ta importante pasobra ora cu un hende ta bin cerca bo ta pasobra cu nan mester di bo ayudo pues bo no por simplemente ‘verwijs’ nan. ” Sra. Kock ta bisa. Bo mester tambe splica nan kico nan tin cu haci anto cua otro instancia lo ta esun adecua pa yuda nan segun FHMDD sea Sociale Zaken, Voogdijraad, Juridische Zaken, un abogado of un dokter pasobra tin hende cu ta bin cu keho di nan curpa y FHMDD no por yuda nan.
”Nos tin e parti ambulante, caminda nan ta bin akinan unda cu nos tey for di 9or di mainta pa 5or di atardi, nan por bin cu diferente pregunta cu nan tin y banda di esey nos tin nos cas di refugio cu ta brinda luga na mas o menos cinco famia.” Sra. Magaly Maduro ta splica Bon Dia. Pa bo bin na remarca pa drenta den e cas di refugio sinembargo, FHMDD tin poco puntonan di locual bo mester ta na altura di dje y un criterio pa bo drenta. Aunke cu tin tanto gana pa yuda henter Aruba mes, segun FHMDD e no ta posibel si bo no ta cumpli cu e cierto criterionan aki. Un di e prome puntonan ta cu bo no por ta un persona cu ta uza droga. Esaki por ta cualkier droga. Tambe, si bo tin un problema psikiatrico anto bo ta diagnostica cu bo tin un problema psikiatrico tampoco bo no por wordo tuma den e refugio na FHMDD. ”E motibo tras di esaki ta pasobra nos personal no ta opgeleid pa por trata cu personanan cu tin e tipo di problemanan aki. Mi ta haya cu ora bo tin un hende den e cas, bo ta dun’e e refugio y trankilidad y bo mester por t’ey p’e den tur su necesidadnan. Anto nos personal gewoon no ta prepara pa e tipo di situacionnan ey”, Sra. Maduro ta bisa. Bon Dia a puntra FHMDD si tin plan pa den futuro traha riba e parti aki di locual nan ta contesta cu tin hopi plan y idea pero cu nan no sa ainda con ta bay cuminsa ehecuta y cristalisa nan. ”Nos sa cu na Aruba e necesidad ta grandi sin laga afo riba nos grandinan tambe y lamentablemente nos cas ta primordialmente pa victimanan di violencia domestico, banda di esey bo tin e ora ey cu nos djis no por tuma hende cu tin problema cu droga ni problema psikiatrico, di alcohol of den general di ningun tipo di adiccion” , Sra. Maduro ta splica.
A yega di keda te laat anochi ta yuda hende
Es mas, segun Sra. Maduro, e siman aki tambe tanto Sra. Suzy Kock y nan trahado social tabata tin hende na FHMDD ta sinta te cu oranan di anochi laat yamando instancia y diferente hende pa yuda nan. Por ehempel, pa un hende cu no tin trabao pa sikiera yuda nan na haya un entrevista pa empleo. Tin hopi cos cu ta ser haci y no ta tur cos ta ser papia of publica segun FHMDD, pero tin en berdad varios biaha cu nan sa keda te oranan di anochi ta traha y asisti hende. Esaki ta mustra e dedicacion y determinacion pa yuda cualkier persona cu ta pidi pa asistencia na FHMDD, no tin discriminacion ni mas cu bo no tin e criterionan menciona, si bo acerca e fundacion seguramente ta bay tin un direccion pa yega na un solucion.
