Mediante un conferencia di prensa di Gobierno di Aruba, minister di Husticia y Asuntonan Social conhuntamente cu otro instancianan a anuncia e ampliacion di servicionan pa loke ta trata salud mental, specificamente e introduccion di un departamento di crisis y un kind en jeugd fact team.
Pa loke ta trata e parti di salud mental, Gobierno di Aruba a informa cu kier pa e cuido di tipo aki bira mas accesibel y tambe percura pa un acercamento multi-sectorial, pa e motibo ey a scoge pa atende cu e parti di adiccion y salud mental resorta bao Ministerio di Husticia y Asuntonan Social debi cu por mira e importancia di e programanan pa atende e problema di salud mental.
Minister a recorda cu na añanan 2021 y 2022 a firma MoU cu tur stakeholders algo cu minister Tjon ta considera importante pa por ehecuta tur e proyectonan, a base di e MoU aki tur e departamentonan ta reuni cu otro pa traha un route map cu ayudo di PAHO pa nan duna atencion na e cuido di salud mental.
E route map aki ta encera cinco punto unda nan ta enfoca pa percura pa tin un acercamento multi-sectorial pero na mesun momento, percura pa e cuido aki bira mas accesibel y tin mas inversionnan cu ta tuma luga tambe, e prome parti ta di leadership and gobernance pa percura pa tin partnership building pa tur stakeholders bin hunto, health service delivery caminda e accesibilidad ta e parti di e cuido aki, health work force pa sigui inverti den profesionalnan, ademas di health information unda diferente investigacion ta para central pa di e forma ey nan por yega na data-drive policy pero tambe e parti di prevencion unda FADA tin un rol importante brindando informacion di salud mental y introduccion di tecnologia nobo manera un Elektronisch patiëntendossier, e ultimo parti di esaki ta e health financing.
“Si bo wak e ultimo añanan, pa loke ta trata Respaldo, Stichting Hunto, pero tambe loke ta trata sector social, tin hopi mas fondo cu a ser poni disponibel y esey ta e motibo dicon, entre otro, e dos servicio aki por ser introduci aworaki,” minister Tjon a bisa.
E diferente proyectonan cu a ser ehecuta caba e ultimo dos aña, ta proyectonan cu a bin for di e stuur groep y e veld mes ta e introduccion di POH GGZ y esaki ta bay ser amplia proximamente cu un opleiding den planning, tambe e opleiding di Mental Health Profesional, basis team cu ta atende cu e problema di lista di espera, introduccion di e ekipo di bemoeizorg cu tambe ta ser amplia cu presupuesto di 2024, Stichting Hunto cu e parti di infrastructura na unda hopi inversion a tuma luga segun minister a sigura y otro renobacion cu a tuma luga na Centro Colorado cu pa otro aña nan lo percura pa lansa e luga aki cu a ser amplia pa mas luga pa adictonan ambulante por haya e cuido necesario, pa finalisa el a trece dilanti cu luna pasa nan a organisa un opleiding pa Cuerpo Policial cu e tema “omgaan met personen met onbegrepen gedrag”.
Ora nan a evalua e oplieiding aki, a bin un peticion for di Cuerpo Policial pa introduci un departamento di crisis y nan mesun momento a bin pa dilanti cu lo mester introduci un kind en jeugd fact team, “esaki ta asina importante pasobra aworaki bo ta bay tin practicamente 24 ora pa dia, un ekipo di profesionalnan disponibel pa por brinda e cuido y e cuido ambulante, por ehemplo, Cuerpo Policial no lo mester transporta un persona mas pa Spoed Eisende Hulp pa haya e cuido cu tur e consecuencianan cu esaki por trece cune, awor nan lo ser transporta pa profesionalnan cu ta brinda e cuido na e sitio cu e personanan aki, sea na nan cas, na caya of otro caminda, cu mas siguridad tanto pa e agente como pa e persona mes,” minister a sigura.
Den e conferencia aki, tambe tabata presente diferente profesionalnan den area di salud mental como por ehemplo, Dr. Natalie Kingsale di Respaldo e cual a bisa cu ta hopi contento di haya e ekipo aki y e parti di finanzas in place pa asina nan por cuminsa duna e servicio aki, “ora nos a bira Respaldo caba, nos tabata consciente cu mester bin un departamento di crisis pasobra aworaki e situacion ta asina cu ora un hende bira malo, e tin cu bira malo y tin cu bira peliger pa asina e por wordo treci si e no kier bin, nan mester ayudo toch, cu un departamento di crisis nos por wordo yama y evalua e pashent mes na cas, zorg pa e no bira un peliger pasobra mas largo e por bira peliger, mas malo tambe ta pa su celebro, kiermen pa zorg pa e cuido por wordo duna na tempo.”
Pa e kind en jeugd fact team, Kingsale a bisa cu nan ta ripara cu tin hobennan cu tin añanan den build pero nan no kier ayudo y no por ofrece na nan nada, kind en jeugd fact team ta bay traha igual cu pa adulto cu un psikiatra, case manager, psicologo, trahado social unda nan por motiva e mucha pa busca ayudo y evita pa nan bay atras mentalmente.
Ademas, el a informa cu nan a saca tur vacaturanan aki y ora nan lo haya e personal esaki lo cuminsa traha.
Pa AZV su director, Edwin Jacobs, pandemia a causa un impacto grandi pa loke ta trata salud mental den comunidad y aworaki ta recuperando di un forma cu ta permiti pa AZV amplia su presupuesto y tambe sigui inverti den cuido general na Aruba.
Na presupuesto di cuido pa otro aña lo crece cu 5.7 % pa lo cual nan dedica e crecemento pa cuido mental na 10%, loke ta nifica un importancia pa esaki.
