Den un presentacion extenso na parlamento Hulandes, minister di relacionnan exterior ta mustra riba e efecto negativo di e crisis na Venezuela pa Caribe Hulandes.
E ta papiando specifico di efectonan cu e situacion insigur lo por tin pa e economia di e islanan Caribense manera Aruba. Y tambe cu e crisis na Venezuela ta haci e islanan mas atractivo pa criminal y otro rednan di subversion.
E presion di inmigrantenan riba e islanan di Aruba, Boneiro y Corsou no ta nan unico problema, e minister Hulandes Stef Blok ta bisa. Pasobra inmigracion riba su mes, e ta enfatisa, por crea un menasa como hasta teroristanan por haya acceso na Europa. Como cu nan por djis uza e rutanan regular. Banda di esaki inmigracion cu no ta regla manera den e caso di Venezolanonan cu ta drenta e islanan ilegal sea keda ilegal despues di vakantie, lo por tin consecuencianan negativo pa e economianan di e parti Caribense di Reino.
“Na Hulanda e economia ta bayendo bon. E ta creciendo y e prosperidad ta aumentando despues di añanan di crisis. Sinembargo mester nota cu e situacion na e parti Caribense den Reino no ta mustra asina bon.”
Pues gobierno Hulandes ta enfatisa cu tin mas factor pa tene na cuenta y no mester atende e crisis na Venezuela solamente den ‘perspectiva di instabilidad y insiguridad’. Asina nan ta bisa den e rapport cu ta encera un strategia riba tereno di siguridad y relacionnan exterior pa 2018 -2022. Esaki nan a presenta awor na parlamento Hulandes.
Instabilidad den full e region
Den e rapport nan tambe ta enfatisa cu e crisis na Venezuela tin efecto riba henter e region. Pues e ta trece instabilidad pa tur e paisnan rond di Venezuela. Segun minister Bok, Reino Hulandes tin interes den mantene e stabilidad den e region aki. No solamente pa motibo di e islanan Hulandes Caribense. Nan ta menciona cu e tambe ta importante pa mantene stabilidad pa Colombia. E paisnan tin un relacion comercial extenso y p’esey e tambe ta pa Hulanda importante cu por mantene esaki.
Pa motibo di esey nan ta bisa den e rapport cu Hulanda lo sostene ‘activamente e proceso di paz’ den e region. “Merca ta un aliado crucial den esaki pa preveni escalacion violento.” Pero Hulanda tambe ta haya cu Mexico, Colombia y Brazil ta importante pa mantene e siguridad den e region aki. E crisis di Venezuela lo ta un topico di discusion grandi ora minister Blok lo bishita Aruba y Corsou na comienso di april. E minister Hulandes ta bisa cu ta importante pa bay e islanan como cu ta tuma e menasa di e crisis na Venezuela pa e islanan hopi serio.
