E crisis Venezolano a keinta ambiente den e di 49 Asamblea General di Organisacion di Estadonan Americano (OEA) cu a tuma luga na Medellin unda Uruguay a retira di e prome sesion plenario como rechaso pa e status cu OEA a duna representacion di Venezuela.
Manera cu reunion a cuminsa y despues cu e canciyer Colombiano Carlos Holmes Trujillo a habri e debate, e subsecretario di Relacion Exterior di Uruguay, Ariel Bergamino, a anuncia retirada di su pais di Asamblea pasobra ta considera OEA “desnaturalisa” den e discusion di e crisis Venezolano.
Tabata anticipa cu e caso di Venezuela lo tabata den centro di atencion, pero e decision di Uruguay a tuma e Asamblea pa sorpresa. Uruguay a splica cu nan tin problema cu presencia di e delegacion Venezolano cu ta representa parlamento Venezolano, pasobra gobierno di Maduro a tuma decision dos aña prome cu ta bandona OEA y cu por lo tanto no por tin delegacion Venezolano den e asamblea.
Den ultimo dos aña OEA a emiti cuatro resolucion contra regimen di Maduro, e mas reciente na april pasa cu a acepta Gustavo Tarre como “representante permanente” designa pa Asamblea Nacional di Venezuela, presidi pa Juan Guaido.
Mientras Nicaragua, Mexico y Bolivia a mustra nan disgusto pa e decision, sin bandona sala, otro paisnan manera Argentina, Brasil, El Salvador y Colombia a critica Maduro y a reitera nan apoyo na Guaido.
Julio Borges a hiba palabra pa e delegacion Venezolano unda el a denuncia cu “awe Venezuela ta un pais invadi pa Cuba y mester liber’e.” Segun Borges, “e regimen di Havana ta igualmente responsabel di kiebro directo di e libertadnan fundamental di e ciudadano, persiguiendo defensornan di derecho humano, periodista, dirigente politico, militar, diputado y tur hende cu ta cuestiona nan.”
