Crisis Team hunto cu e veld di enseñansa, e siman aki ta reuni pa tuma decisionnan riba e aña escolar nobo dilanti porta. E veld di enseñansa ta sigui e desaroyonan nobo di Covid-19 y hunto cu Crisis Team ta bay plania si scol ta habri e siman proximo y con scolnan lo habri si esaki ta e caso.
Ya prome cu vakantie, Crisis Team y e veld di Enseñansa a traha riba algun plan di contingencia cua nan ta riba mesa pa deliberacion e siman aki. Lo scoge cua ta e miho plan na bienestar di alumnonan y docentenan. Prome Minister Evelyn Wever-Croes ta pidi comunidad pa tene pasenshi mientras cu reunionnan ta andando y decisionnan tin di wordo tuma pronto.
“Nos ta den temponan cu hopi reto, incluyendo enseñansa den e tempo dificil aki. Nos ta keda en espera di decisionnan di e prome plan di contigencia cu lo wordo tuma e siman aki den e reunionnan di Crisis Team y e veld di Enseñansa pa asina informa docentenan, alumnonan, mayornan y comunidad henter debidamente”, Prome Minister a duna di conoce.
