Mirando e desaroyonan di pandemia di Covid-19 na Aruba, unda ayera a surpasa e cantidad di mil caso activo, Crisis Team a tene un conferencia di prensa unda a introduci algun medida pa purba di combati e aumento di caso y hospitalisacion.
Prome Minister demisionario, Evelyn Wever-Croes a cuminsa informando cu a tuma decision pa scol no habri proximo siman mas, sino keda cera te dia 1 di september proximo. Esaki pa motibo cu a cuminsa tuma nota cu muchanan tambe ta contagiando di Covid-19. Actualmente, muchanan bao 12 aña di edad no mag di vacuna, y pa e motibo aki, cu intencion pa protege e muchanan, a tuma decision pa tene scol cera.
A pesar cu recientemente Crisis Team a introduci medidanan caba, manera orario di ciere di establecimentonan comercial y gebiedsverbod, Wever-Croes a indica cu no kier a warda dos siman pa introduci mas medida, teniendo cuenta cu tanto e aumento den cantidad di hospitalisacion como e hecho cu muchanan no ta vacuna.
Igualmente, DVG a informa cu segun nan datonan, e fuentenan di contagio principal ta clubnan nocturno y restaurant. Pa e motibo aki, Crisis Team tambe a introduci medida pa purba di controla e desaroyo aki. Ta prohibi fiesta cu baile, y ta permiti solamente un musico toca riba escenario, y solamente musica suave di background. Fiestanan priva tampoco ta permiti.
Finalmente, Crisis Team a indica cu ta keda evalua e desaroyonan di pandemia cada tres dia, y no ta descarta cu por introduci mas medida. Mientras tanto, ta urgi tur ciudadano pa cumpli cu protocolnan di higiena, manera uso di tapaboca, laba man y tene distancia social, y tambe pa tuma e vacuna.
