Segun resumen ayera di Departamento di Salubridad Publico DVG, a registra dos morto mas pa e malesa Covid19, causa pa e virus SARS-CoV-2.
Cu e dos caso aki, e cantidad di fayecido durante henter a pandemia na Aruba aumenta na 68. Crisis Team a informa cu nan ta analisando e tendencia di e pandemia y e aumento di casonan di fayecimento.
Tambe DVG a informa cu ayera tabatin 20 persona a recupera, mientras cu a registra un total di 32 caso nobo di Covid-19. Di esakinan, 4 no ta residente. E cifra di no-residente positivo ta encera esnan no-residente cu a haci test na aeropuerto na momento di nan yegada, y na laboratorionan prome cu nan a bandona Aruba.
E cantidad total total di test ehecuta ayera na e diferente localidadnan na Aruba, entre otro laboratorio di hospital, laboratorionan priva y aeropuerto ta 481 test. Tasa di positividad (‘Postivity rate’) entre nos residentenan ta 15%.
A registra 329 caso activo ayera.
Di su banda, hospital Dr. Horacio Oduber ta informa cu tin un total di 16 persona interna, di cual 5 ta den Cuido Intensivo y 11 riba unidad general di covid. Edad promedio di esnan ingresa pa extra cuido ta 63 aña.
