Vilmar Mendonça tabata gerente di recurso humano di varios empresa na Brasil, pero desde un aña pasa,  e ta bibando riba caya di Rio de Janeiro, manera ta sucede cu  hopi victima di e crisis na  e “ciudad maraviyoso”.

Mendonça a perde su trabao na 2015 y el a purba di mantene su mes cu placa cu el a spaar, pero awor e tin 58 aña y e ta drumi dilanti di un banco, na aeropuerto Santos Dumont.  Mendonça a laga su pertenencia den un oficina di un banco, caminda e ta  un cliente, e ta usa baño publico pa haci su necesidad y ta bibando cu e cuminda cu varios organisacion no gubernamental ta dun’e pa hende sin cas.

“Ta un situacion teribel, pero mi no a haya otro oportunidad”, Mendonça  ta bisa. E ta un ehecutivo flaco, divorcia y sin yiu, di Itajaí (Santa Catarina, sur). El a declara mientras e tabata busca algun oferta di trabao riba  su computer y cu e wifi di aeropuerto.

Vilmar Mendonça no ta parce un persona sin un cas, pero realmente e ta parti di un  miyon di persona cu no tin un cas  na ciudad di Rio de Janeiro. Vilmar ta bisti bril, un paña formal y sapato moderno. Ultimo lunanan di aña 2016 alcaldia di Rio de Janeiro  tabatin 14.279 persona den situacion di ta riba caya. E cifra ta tres biaha mas cu na aña 2013.

70 persona sin cas tin estudio superior, manera Vilmar cu a gradua como profesional di administracion di empresa na Sao Paulo y el a traha pa algun empresa multinacional. E situacion ta mustra un  recesion cu a laga 13. 5 miyon di hende sin trabao, y un ciudad, cu un aña pasa tabata inaugura wega olimpico cu hopi boroto y awor ta den un situacion hopi dificil.

E no a conta hopi detaye di su situacion actual y e ta kere cu e situacion ta temporal, entre tanto e ta purba di keda lanta y no cay. Durante ora di dia e ta practica ehercicio, y tambe ta lesa algun buki na cualkier coffee shop, of e por skirbi riba su cuenta na Facebook, caminda e tin un potret bisti cu paña formal. Algun biaha e ta participa den varios entrevista pa haya algun cupo di trabao, pero unda e mester participa hunto cu otro candidato mas hoben. Anochi laat e ta usa un paña mas senciyo, y asina ta purba pa no keda identifica, mientras e ta prepara su matras improvisa dilanti di e banco, cerca di camara di seguridad di aeropuerto. “Mi ta purba di biba mi so, pa asina no haya algun mal habito di otro hende, pasobra mi por cuminsa purba cos cu mi no kier, manera alcohol, droga o suciedad,” el a bisa.

Funcionario cu no tin salario
Mayoria di persona no ta mira e realidad na Rio de Janeiro, pero hopi turista cu ta bishita Copacabana y Ipanema ta mira persona sin cas riba tur skina. E potret ta hopi diferente cu esun cu ta duna promocion den buki di turismo. Na centro historico di Rio, cerca di e lugar miho conoci como “Arcos de Lapa” cada nochi un grupo di 20 persona ta drumi riba caya, otro mas ta drumi riba carton. E imagen aki ta impresiona, pero ta mas impresionante tur historia cu tin tras di cada “morador de rua” (habitante di caya).

Mayoria ta hende preto di origen pober, otronan ta hende adicto na droga, cu problema psicologico of problema cu nan famia. Tin bendedor riba caya y funcionario hubila, manera ta e caso di Gilson Alves. Gilson, di 69 aña a traha 35 aña como tecnico di radiografia na  hospital publico di Rio. Pero pa motibo di e retraso di su placa di pension el a bende tur su  propiedad y a laga e apartamento cu e tabata huur.

E homber preto aki, cu tin un mirada hopi suave, nunca a biba un bida facil. El a perde un pia tempo e tabatin 5 aña, unda un tram a pasa riba dje. E tabatin dos luna riba caya, y despues a ser rescata pa e servicio di alcaldia y nan a hib’e na un albergue municipal. Rio tin 64 albergue municipal cu capacidad pa 2200 persona.

“Mi ta sinti hopi tristo, humiya, golpia pa presta mi servicio aki pa hopi aña y awor mi ta bibando akinan, pa culpa di e gobierno aki,” el a bisa. Gilson ta comparti un camber, na un  albergue di Ilha do Governador, cu seis persona mas,  entre nan  Jorge da Cunha, un obrero cu problema di respiracion di 63 aña,  cu a perde su trabao  dos aña pasa.

E banda mas debil
“E situacion ta critico”, Teresa Bergher, secretario di asistencia social di Rio a reconoce. Hopi hende ta yega na Rio pa haya algun cupo di trabao durante copa di mundo di 2014 y wega olimpico di 2016, pero awe e estado petrolero ta victima di e prijs abao di petroleo. Brasil ta golpia tambe pa un corupcion grave. Ex-gobernador Sergio Cabral (2007-2014) a haya un condena di 14 aña di prizon, pa motibo di desvia miyones di dollar. Un parti di e placa cu  a ser recupera a permiti na luna di maart, pa paga e placa di aguinaldo cu tabata retrasa, pa 150.000 funcionario pensiona.

“Aumento di persona bibando riba caya di Rio de Janeiro tin su origen den e crisis economico di e pais aki,  y ausencia di algun plan di politica publico,” Carla Beatriz Nunes, defensor publico di Brasil a splica. Varios red di voluntario di iglesia y organisacion no gubernamental ta duna atencion social na hende riba caya. Nan ta duna cuminda y nan ta organisa algun clase di yoga tambe pa hende sin un cas.

“Nos ta paga e crisis, nos cu tin un situacion financiero pober y cu poco estudio,”  Robinson, obrero di construccion, sin trabao y di 43 aña, a bisa.