ORANJESTAD – E Crisis Plan Social ta hopi importante pa Aruba, mirando e cantidad di problema social riba nos isla. Maske nos ta lesa constantemente den media tocante e progreso di e Crisis Plan Social, tin ciudadano cuestionando si algun implementacion a tuma luga, y si tin algun hende a cuminsa beneficia di esaki.
Segun parlamentario di oposicion, Mervin Wyatt-Ras, por scucha di pueblo cu nan ta fada di e promesanan cu a wordo haci y cu no a wordo cumpli. Un punto clave tin di haber cu edad di pensioen. A wordo priminti cu lo baha edad di pensioen y nan no a cumpli, y te hasta nan ta nenga cu nan a priminti esey, segun e parlamentario di oposicion.
E ta haya cu a wordo crea un situacion di un ‘mega debe’ pero awor ta resulta cu e porcentahe presenta pa Oficina Central di Estadistica (CBS) den nan cuenta nacional relaciona cu nos GDP y e debe nacional, tabata 10% mas abou di locual e gobierno actual a pretende y cuestiona continuamente e gobierno anterior di dje.
Igualmente el a trece dilanti cu gobierno a priminti durante campaña cu niun tipo di abuso no lo tuma luga mas. Unabes cu nan a sinta como gobierno –segun Wyatt-Ras- a wordo crea un crisis financiero. A base di e crisis financiero aki a dicidi di bin cu e crisis plan. Pero aworaki hopi hende y hopi organisacion ta keha pasobra nan no ta hayando e sosten pa medio di e crisis plan. “Kiermen e crisis plan aki no ta wordo ehecuta,” el a declara.
Ademas ta wordo papia di un crisis plan pa atende cu nos hendenan mas vulnerabel. Sinembargo, debi na e aumento di prijs di productonan debi na aumento di impuesto, nos hendenan ta bayendo den un grado di pobresa. “Esaki no ta e situacion cu ta deseabel pa Aruba,” el a bisa.
