Esaki ta e pregunta cu hopi ciudadano ta haci, a pesar di e rueda di prensa mas reciente di gobierno diahuebs anochi, unda a atende e asunto. E cifranan preocupante di diahuebs a traha lugar pa cifra mas imponente ainda di ayera y ta parce cu nos ta rumbo pa yega y talvez sobrepasa e ‘peak’ di september aña pasa, unda nos a yega na algo mas di 1.600 caso activo pa dia. Ayera nos a registra caba 1122 caso activo, di cual mas di 90% di hende local. Lo mester mira si e medidanan, bastante suave ainda, ta suficiente pa pone un paro na e brote actual. Aunke cu gobierno no ta asina inclina na tuma e pasonan mas fuerte posible awor caba, nos ta cerca di e momento unda di tur manera mester tuma e medidanan aki, pasobra sin esakinan lo no bin un cambio positivo.

Mester corda cu aña pasa a tuma nos algo mas di un luna pa baha atrobe na un nivel aceptable di presencia di e virus. Dia 20 di october nos tabata atrobe na un nivel di alrededor di 250 caso activo, despues cu dia 16 di september nos a yega na e cantidad mas halto di caso activo. Un aspecto positivo di e crisis di aña pasa: dos siman despues di yega na e maximo dia 16 di september, e cantidad di caso activo a cay te na 644, como mil caso menos den dos siman. Esey en principio ta posible awor tambe, suponiendo cu ta tuma e mesun medidanan si, loke no ta e caso, ainda. Ademas cu vacunacion mester hunga un papel, principalmente mirando e hecho innegable cu e gran mayoria contagia y hospitaliza ta hende no vacuna.

Tambe a tuma e decision cu scolnan lo habri te dia 1 di september y no otro siman. Nos ta supone cu esaki ta duna un tiki mas espacio pa mira con e situacion ta sigui desaroya. Sin embargo, si no tin un mehoracion den e condicionnan general, es decir si e brote actual sigui su curso anto dia 1 di september tampoco lo tin condicion pa por habri scol. Tene tur mucha na cas no necesariamente tin influencia riba e situacion general.

Pero un preocupacion ta keda y esey ta cu nos no ta sinti cu realmente ta duna e crisis di salud aki e atencion necesario. Realmente tabata e noticia di e caso di Aruba den exterior cu a pone tur atencion local bay riba e caso aki. Y dentro di un siman despues nos ta papiando di un situacion cu ta trata di maneha ainda, pero cu por bay for di man tambe. Y esey lo tin efecto grandi riba e otro asuntonan cu ta preocupa gobierno y ta prioridad pa nan. A caba di yega na un acuerdo cu Hulanda, hunto cu e otro islanan, loke ta nada mas cu e inicio di e periodo dificil. No solamente dificil pa implementacion di e decisionnan controversial cu mester tuma, pero tambe pa e ruta pa recuperacion cu por resulta mas complica cu hopi lo kere. No mucho tempo pasa hopi di nos por tabata pensa cu recuperacion economico completo lo tabata simplemente tin henter turismo den full swing y ya… E sucesonan di ultimo siman ta mustra nos con fragil e recuperacion por ta, ocasiona pa e pandemia no bon controla. Nos ta experimenta awor e efectonan di un variante, cu ta ocasiona hopi mas problema cu nos por a premira algun tempo atras, sigur cu e animo cu produccion y distribucion di e promer vacunanan a crea. Y de paso ta mustra nos con dificil y impredecible e proximo par di aña por bira. Un of mas di e interupcionnan manera nos por tin awor den turismo, pa motibo di e situacion di Covid, y tur e proyeccionnan faborable pa nos economia y pa gobierno no ta valido mas. Esey lo implica mas tardanza den recuperacion y mas dependencia pa mas tempo di Hulanda. Y esaki por bay pone mas presion riba e relacion cu Hulanda, cu sigur no ta bay acepta mas tardanza den ehecucion di tanto cos cu no ta agradable pa e politiconan, pero cu gran parti di comunidad ta reconoce como necesario.

Loke lo ta importante anto ta pa pospone asunto so cu obviamente tin di haci cu e situacion di crisis, y no haci wega cu cosnan cu absolutamente no ta permiti retraso. Manera e decisionnan cu mester tuma pa realmente crea algo cu ta haci economia y comunidad avanza. Ta imposible pa keda pospone decision kico ta bay haci cu e tereno di e refineria, por ehemplo. Atrobe a bin un silencio den kico lo haci, mientras ta tene henter comunidad pa payaso cu un refineria full moderniza den un region unda tin refineria mihor cu e monton di hero bieu na Aruba, cu tambe ta para pa varios aña caba. Ki dia gobierno ta stop di perde tempo cu proyecto cu no tin futuro den realidad economico di awe, envez di yega na conclusion cu nos mester tuma un otro rumbo? Nan mes no ta mira cu tur plan basa riba palabra bunita, manera cannabis, no tabatin ningun perspectiva realistico? Nos no tin hopi alternativa pa turismo, pero esey no mester stroba nos di keda cu dos pia na tera.