“ATIA preocupa pa brote di insiguridad na Aruba”. Asina ta lesa titular den Bon Dia Aruba (6 di mei 2016). Ta mustra riba e ola di violencia y criminalidad cu ta forma un menasa serio pa imagen di Aruba y nos turismo. Atraco riba turista, supermarket etcetera ta acapara mayor parti di e preocupacion, pero tin otro tipo di insiguridad na Aruba cu ta den aumento y sigur, sigur un tipo cu cualkier ciudadano y turista lo ripara.
Esey ta insiguridad di nos trafico. Ta facil pa mustra dede riba criminalnan cu ta horta y comete actonan violento, pero pa uza e palabra ‘brote’, unda e criadero ta cu a permiti e brote aki? E criadero ta e falta di respet pa nos regla y leynan, y un falta di disciplina, combina cu ignorancia y egoismo ta su ingredientenan principal. Concretamente mi kier mustra riba dos fenomeno cu ta forma un atake riba siguridad di nos tur. Mi ta papia di situacion rond di auto cu ‘tinted glass’ y di autonan cu stuur na man drechi. Si nos bay DTI pa keur nos auto, DTI ta bisa nos pa kita e tint di bo windshield y na banda robes y drechi di chauffeur. Un regla cu ta logico y cu ta refleha sentido comun. For di paden bo mester tin un bista cla riba caminda, tambe den scuridad.
Pero tambe ta importante pa otro usuario di caminda por wak bo den cara, por ehempel pa duna señal cu nan ta duna preferencia y pa nan por haya feedback visual cu bo a compronde bon. Otro motibo ta cu polis mester por controla cu nada ilegal ta tumando luga. Nos tur sa cu abuso di alcohol y droga ta causa mayoria di accident serio, sin menciona e aumento alarmante di uzo di telefon y texting ora di core auto. Sin embargo, pa algun motibo straño, polis no mag di actua contra chauffeur cu ta core rond den auto cu glas getint. Esey ta causa confusion entre ciudadano y ta resta credibilidad na nos institucionnan. Ta ironico pa constata cu hasta autonan di cierto minister (cu ‘D-wagen’) y di parlamentario ta full getint.
E otro punto ta e asunto di autonan cu stuur na man drechi. E discusion tocante su (in)siguridad a/ta wordo hiba caba, pero basta bisa cu no ta por nada cierto auto ta wordo fabrica pa cierto mercado, dependiendo di e fluho di trafico. E punto ta cu Aruba a bira un free-for-all, y esey ta locual turista ta ripara tambe. E uzo di muffler ilegal cu ta produci hopi desordo tambe ta añadi na e sensacion di insiguridad y violencia. E hecho cu polis aparentemente apenas ta actua contra e fenomeno aki ta otro ehempel di erosion di norma y balor. Mi sa cu hopi miembro di cuerpo policial ta loco pa actua contra tur esaki, pero nan man ta mara. Nos legisladonan, entre otro nos parlamentarionan den nan autonan haci scur manera nan tin algo di sconde, ta esunnan cu mester facilita cuerpo policial cu e hermentnan legal pa actua. Y si nos como ciudadano ta laga tur esaki pasa, sorry, pero nos no ta complice anto?
