Caso penal denomina “Flamingo” a cuminsa na september di aña 2019, unda ex-minister Otmar Oduber tabata forma parti di Gabinete Wever Croes I. Oduber ta e sospechoso principal den caso aki, unda e ta wordo sospecha di comete shete delito.

E delitonan ta lo siguiente: falsificacion di documentonan, estafa, aceptacion di soborno, mal uso di su funcion como minister, participacion den un organisacion criminal, labamento di placa y onverklaarbare vermogensverhoging. Esaki ta nifica cu ex-minister Oduber no por a duna un splicacion legitimo pakico y con su posicion financiero a mehora.

Oduber ta e di tres ex-minister cu ta wordo sospecha di comete delito di participa den un organisacion criminal den funcion como minister di Gabinete Wever-Croes I. Paul Croes tabata minister di Hubentud y Asuntonan Social y Labor den Gabinete Mike Eman II y e ta e prome cu a wordo condena pa e delito specifico aki. Sdemas Oslyn Benito (Benny) Sevinger, kende tambe tabata minister den e mesun gabinete, y na e momentonan aki ta e sospechoso principal den e caso penal Avestruz.

Organisacion Criminal

E elemento ‘organisacion’ ta e definicion cardinal di e articulo 2:79 di Codigo Penal di Aruba. Sin participacion no tin organisacion. Segun e articulo aki, pa por bisa cu e ta un organisacion criminal, tin cu cumpli cu tres criterio: tin un cooperacion mutuo entre e sospechosonan; tin un cierto structura; y mester tin un continuacion.

E organisacion aki su structura no mester ta grandi, mester tin minimo dos sospechoso y no necesariamente e sospechosonan den e organisacion mester conoce otro. Ademas door cu ta un organisacion criminal, nan no tin exigencianan pa cumpli ni ta mara na tempo di existencia, y no mester tin deliberacion. E unico intencion di e organisacion ta pa comete actonan criminal.

Articulo 2:79 ta regarda proteccion di e comunidad contra e peliger di e sorto di organisacionnan criminal aki, cu ta dirigi specialmente riba colaboracion mutuo cu nan mesun dinamismo, cu ta un riesgo grandi pa comete e hechonan castigabel aki. Articulo 2:79 aki di Codigo Penal di Aruba ta pa evita e existencia di cierto gruponan cu e intencion di comete actonan criminal.

E caso Flamingo

Caso Flamingo a cuminsa haya forma dia 24 di juni di aña 2020, na momento cu Landsrecherche hunto cu RST di Hulanda bao di supervision di hues comisario y Ministerio Publico a haci un entrada hudicial na Oduber su cas, caminda nan a confisca documentonan y dos container cu tabata para dilanti di cas di Oduber na Pavia.

E mesun dia ey, un ekipo grandi conforma pa Ministerio Publico, RST, Landsrecherche y Interpol a haci un entrada hudicial na cas di un comerciante na Esmeralda na unda cu segun informacion di otro medionan local, tambe nan a drenta na un compania hopi conoci di carga y na General Aviation Terminal unda cu autoridadnan a sigui investiga y a confisca documentonan.

Interpol

Loke a hala Bon Dia Aruba su atencion ta cu den un di entrada hudicial tabatin e participacion di Interpol dunando asistencia, nan ta un organisacion internacional cu ta facilita cooperacion policial y control di crimen internacional, ta e organisacion policial mas grandi na mundo. Nan ta duna apoyo investigativo, experticio y capacitacion na e forsanan di orden na nan miembronan, su trabao ta enfoca den siguridad publico, crimen organisa, labamento di placa, delitonan economico, corupcion, entre otronan cu ta crusa fronteranan.

E organisacion aki ta funciona como un red di organismonan encarga di haci cumpli e leynan di diferente paisnan, nan ta lucha contra delincuencia internacional.

Siguiendo cu e caso, 22 di augustus di 2020 investigacion a continua unda cu un otro entrada hudicial a tuma luga na cas di otro sospechoso di inicial E.F cu tabata fungi como ex-campañado di Oduber, di mesun manera e persona aki a keda deteni dia 2 di maart ultimo na unda cu e ta wordo sospecha di ta envolvi den iregularidadnan den otorgamento di terenonan erfpacht.

Ayera, a keda conoci un detencion di otro persona cu tambe ta relaciona den e caso investigativo aki unda cu Landsrecherche reforsa cu Cuerpo Policial y bao guia di Ministerio Publico a haci un entrada hudicial na cas di e persona ey.

Otmar Enrique Oduber a duna su prome pasonan den mundo politico cu Hubentud Activo y Consciente (HAC) e fraccion hubenil di partido AVP, na 2009 el a bira minister di Turismo y Transporte den e prome Gabinete Mike Eman I y despues na 2013 el a haya e mayor cantidad di votonan despues di Mike Eman unda el a mantene e mesun cartera na e di dos gabinete di Mike Eman.

Na aña 2016 el a renuncia di e funcion ey unda cu despues el a funda e partido politico nobo POR caminda el a haya dos asiento na aña 2017 y e la bira minister di Infrastructura y Medio Ambiente di Gabinete Wever-Croes I pa finalmente retira di politica na aña 2019.