Un suceso nobo sangriente ta laga luto na El Salvador. Diasabra anochi, cuatro miembro di un famia a ser asesina pa tiro, den cual a muri dos mucha di 2 y 10 aña.
E suceso a tuma luga na Finca San Cristóbal di e localidad Potrero Grande Arriba, na municipio di Santa Ana, caminda a yega un grupo di homber pa asesina Gabriel de Jesús Cristales Alcantara di 35 aña; y su pareha Marta Alicia Sagastume López di 30; y nan yiunan: Josué di 10 aña y Edwin di dos aña.
Fiscalia a informa na corant Prensa Grafica, cu Cristales tabata miembro di un pandiya conoci como “MS 18” y miembro di un pandiya rival a tir’e cu un arma di candela na su cabes, pa despues marca cu un cuchiu e letranan “MS” riba su curpa. E letternan MS ta e prome letternan di e pandiya rival, conoci como Mara Salvatrucha, e pandiya mas grandi di El Salvador, cu tin hasta sucursal na varios parti di Merca.
E muhe a ser asesina cu un tiro na su stoma y e tabatin otro tiro tambe na su rudia. Tur dos mucha chikito a haya tiro di arma di candela tambe na nan abdomen.
Polis nacional a bisa cu Cristales tin antecedente di homicidio y el a huy pa mas di dos aña di polis di El Salvador. E homber a dificulta su detencion pasobra e tabata cambia hopi biaha di cas. Segun informacion e homber tabata drumi durante ultimo dianan den un tent den un luga yen di mata di koffie, cu ta cerca di e cas, caminda su muhe y nan yiunan tabata biba.
Segun informacion cu a sali na luz publico e pareha tabata separa desde varios luna, pero e homber a bishita e muhe pa purba di drumi un nochi cu nan na su cas y riba caminda pa yega nan a ser asesina.
