Recientemente Minister Chris Romero a indica cu tur piscado, cunukero, horticultor y criador di bestia, lo rekeri di un permiso special pa asina nan por abastece nan mes cu e productonan necesario pa mantene nan practica, y como tambe pa nan eherce nan trabounan diario.
E crisis reinante den cuadro di e Coronavirus a obliga Gobierno di Aruba na tuma diferente decisionnan pa proteha un y tur ariba nos isla, poniendo semper e ser humano central. Manera ta conoci, e decision di mas reciente cu a keda tuma ta e asina yama ‘Shelter in place’, cual Prome Minister a anuncia publicamente, y esaki tin tur su obligacion y consecuencianan
E mandatario a bisa cu nos ta experenciando un crisis mundial sin precedente. Lastimamente e pandemia di COVID-19 a pone cu como pais, Aruba tin di bay adapta na cierto reglanan di emergencia temporario, pa asina evita lo mas posibel pa e virus aki sigui plama.
Teniendo na cuenta e obligacion y responsabilidad di nos criadornan di bestia, piscadonan y cunukeronan pa cu mantencion di nan actividad den nos Sector Primario, nos a yega na cierto areglonan pa nan trabou wordo afecta lo menos posibel durante e temporada cu e ‘shelter in place’ lo ta vigente.
Sinembargo, tin cierto areglonan di orario cu si mester tene na cuenta cune. Pa cu esaki, Minister Romero a instrui Santa Rosa/DLVV pa informa e grupo di criadornan di bestia, piscadonan y cunukeronan riba e maneho temporal cu ta conta pa nan y e vigencia di esaki.
Pa tur informacion y guia encuanto e maneho nobo temporal, por fabor tuma contacto cu Santa Rosa/DLVV.
