Iglesia Catolico no ta contra di cremacion di difunto sino cu nan ta contra cu loke ta wordo haci cu e shinishi despues. Kiermen si e shinishi di e difunto no ta wordo dera debidamente den un santana of sitio santo of sagrado autorisa pa Iglesia mes. Ya cu esaki ta demostra un aprecio grandi pa e difunto su feliz memoria, specialmente riba un dia manera awe: Dia di Tur Difunto.
Pastoor di parokia di Paradera, pastoor Toti Fuentebella kende tambe ta Vicario Hudicial na encargo di Tribunal Diocesano cu ta interpreta e leynan di Iglesia, a duna un splicacion riba e documento cu Vaticano a publica recientemente, tocante entiero di difuntonan, cremacion y conservacion di shinishi den caso di cremacion elabora pa e congregacion di e Doctrina di Fe. E ta e departamento di Iglesia Universal cu tin autoridad competente pa traha prohibicion tocante sacramento y ritualnan.
Documento
Pader Toti a bisa cu e congregacion menciona ariba a introduci un documento titula na Latin: “Ad resurgendum cum Christo”, kiermen “Pa resucita cu Cristo”. E documento aki ta trece cu ne un elaboracion y prohibicion di algun practica propaga entre Catoliconan manera conservacion di shinishi den cas di famia. Tambe tiramento di shinishi di e difunto den lama y te hasta pa uza e shinishi como recuerdo uzando cualkier instrumento of prenda pa conserva nan.
Tiramento ariba lama
Aruba no ta un excepcion riba e asunto aki despues cu e sistema di cremacion a keda introduci den nos isla no mucho tempo pasa. E no ta kere cu ainda nos no a bay mucho leu, pero tin hopi echonan di tiramento di shinishi ariba lama. Te hasta turista a yega di bin cerca dje cu e shinishi di nan difunto pa celebra misa y despues tira nan riba lama mirando cu nos ta un isla, locual como sacerdote el a nenga rotundamente.
E hendenan cu kier haci esaki, pader Toti semper ta duna nan un splicacion teologico pa kico Iglesia ta contra di e practica aki. Tambe tin caso cu e shinishi ta wordo plama den aire for di cierto haltura. Of tambe otro caso tin di haber cu reparticion di e shinishi di e difunto entre e diferente miembro di nan famia.
“Pa ehempel un tiki di shinishi pa e yiunan cu ta biba na Aruba, y un tiki shinishi pa e yiu cu ta biba na Hulanda of otro caminda. No mag. Mester sigura respet y mester cumpli cu e condicion adecuado pa e conservacion di e shinishi.”
Cremacion
E ta aclaria cu cremacion ta legal y Iglesia Catolico no ta contra cremacion, ya cu esaki ta para riba e prome punto di e documento menciona. E documento mes ta bisa: “Cremacion ta legal pero mester conserva e shinishi na un luga sagrado”.
Igualmente pader Toti a laga sa cu Iglesia tampoco ta mira motibo doctrinario pa evita e practica di cremacion. “Ya cu cremacion di e restonan mortal no ta toca e alma. Ni tampoco ta nenga e doctrina Cristian tocante e mortalidad di alma.”
Pader Toti ta splica cu como Catolico nan ta kere den inmortalidad di e alma y nan ta kere tambe den resureccion di e curpa.
Sinembargo e documento ta enfatisa cu Iglesia ta prefera deramento di curpa. Esaki kiermen cu nan ta haci e Respons den misa y despues nan ta dera e curpa den santana cu ta e luga apropia aproba dor di autoridad Eclesiastico competente. Tambe tin misa cu tin un sotano unda tin osario unda ta wordo dera e wesonan of shinishi di e difunto. Nan ta e sitionan sagrado apropia unda e restonan di e difunto por sosega na paz.
Prohibicion
Iglesia a bini cu prohibicion pasobra iglesia ta un institucion cu mester mantene e tradicion. Iglesia ta recomenda den forma insistente cu e curpa di e difunto mester wordo dera ya sea den santana of otro luga sagrado. E documento menciona ariba ta recorda cu na 1963 Santa Sede a establece cu Iglesia ta conseha den forma bibo y e piadoso e custumber di dera resto mortal di e difuntonan.
Celebracion
E instruccion aki ta yuda pa evita e posibilidad di lubida nos sernan keri cu bay laga nos. Pader Toti a bisa cu awe Iglesia ta celebra e fiesta di tur difunto. “Si bo ta tira e shinishi den lama, si bo ta tire den laira, of riba tera, unda e shinishi pa e famia por celebra e fiesta di tur difunto ta.”
Tambe Iglesia ta haya cu e ta un falta di respet di benta e shinishi den un sitio cu no ta santo, ya cu e documento menciona ta indica cu e ta un tipo di maltrato. P’esey e enfasis ta wordo haci pa dera e shinishi den un sitio sagrado autorisa pa autoridad eclesiastico pa e santidad y dignidad di e resto di curpa di e ser keri cu a fayece.
El a bisa cu Iglesia ta permiti cremacion ya cu nan ta establece e motibonan di cremacion ya sea pa higiena, economico y/of social. Un caso di higiena tin di haber ora cu un curpa ta wordo haya den estado basta avansa di descomposicion. Un caso economico ta ora cu e famia di e fayecido lo desea di dera e resto di nan ser keri den otro pais, pero nan no tin placa suficiente pa transporta e caha di morto, y nan ta opta pa cremacion cu ta mas practico. Igualmente riba aspecto social, e deseo di e difunto no por ta contra di e doctrina di Iglesia. Pa ehempel e curpa ta wordo crema pasobra e deseo di e difunto tabata pa plama su shinishi den lama.
Pader Toti a señala cu Vaticano tambe ta recorda cu deramento ta e prome forma mas adecua pa expresa Fe y speransa den e resureccion di curpa. E manera of rito apropia ta pa haci e Respons of entiero na misa, caminda e difunto ta pertenece. Despues e ta wordo hiba na santana pa e resto di e curpa sosega na paz. “Esey ta e forma corecto y adecuado pa expresa e respet y dignidad di e curpa’, segun pader Toti Fuentebella.
