Antes cremacion no tabata un opcion, pero aworaki si. Mirando e situacion di Covid-19, den otro paisnan e victimanan mortal di e virus aki ta wordo crema. Na Aruba esaki no ta un obligacion, pero e por ta un opcion si.
Sinembargo, hefe di Dienst Warenkeuring en Hygiene, Yvette Geerman a bisa cu pa atende un caso asina, nan tin un protocol. Eynan ta para henter e proceso si un persona a fayece di Covid. Si e ta wordo dera of si e mester wordo crema. E ta depende di e famia.
E protocol ta indica e forma corecto higienicamente pa minimalisa e riesgonan. Specialmente uzando tur e materialnan y proteccion personal corecto pa atende cu Covid. Pero tambe pa cualkier otro tipo di malesa contagioso. Den e casonan aki e funerarianan mester cumpli cu e protocol manera debe ser.
Tambe cremacion a bira un opcion mirando cu nos ta un isla chikito, y e santananan cu no tin espacio mas pa sigui dera. Ademas nos poblacion a crece hopi durante e delaster añanan. Ta asina cu cremacion pa atende cu nos difuntonan ta birando un opcion cu no ta wordo descarta. Sinembargo Sra. Geerman ta kere cu prome mester bin un estudio pa determina den cual direccion nos mester bay.
