Creditornan a bay di acuerdo pa duna Serlimar un periodo pa por regla su asuntonan financiero. Ayera merdia 2’or, den Renaissance Conference Center huez comisario a dirigi e sesion cu creditornan durante cual a discuti e asina yama surseance van betaling, suspension di pago pa Serlimar.
Esaki segun peticion di e curator mr. Geert Reps, kende a haya e encargo desde 19 di mei 2020 riba e maneho financiero di Serlimar. Como curator, Reps ta duna aprobacion na pagonan, sea ta debe of salario, of cualkier otro.
Awe mr. Reps a hiba su argumentonan dilanti huez, den presencia di e creditornan kendenan mester a vota si ta bay de acuerdo cu e surceance van betaling, esta suspension di pago. Gran mayoria di e creditornan a bay de acuerdo pa warda pa cobra locual Serlimar debenan, y vota pa e surceance bira uno definitivo.
Huez lo duna su decision dia 2 di September si ta bay pa un surceance definitivo. Pero mirando e argumento di curator Geert Rep y e disponibilidad di e creditornan, tur cos ta mustra cu lo tin aprobacion pa un suspension di pago definitivo.
Segun Director di Serlimar Anko Koopmans, un suspension di pago definitivo sinembargo no ta nifica cu Serlimar ta for di problema. Al contrario, Serlimar lo mester aumenta su entrada y traha y purba pa cumpli cu e debenan cu tin para awor den e ‘surseance pot,” Koopmans a bisa Bon Dia Aruba. “Nos a yega asina leu cu nos por a yega na un acuerdo cu hopi creditor pa por sigui y tene cabez riba awa.”
Pero e ta keda un necesidad si pa Gobierno yuda Serlimar financieramente. Esey tabata un di e exigencianan y curator Geert Rep a presenta e punto aki na huez tambe. “Awor nos ta bayendo den rumbo di e surseance van betaling definitiivo y pa nos ta sigui cu Serlimar, den e caminda cu nos a stipula awor aki caba, unda nos ta bay wak pa baha gasto y hisa entrada pa mira con ta sobrevivi den e mundo di negoshi,” tabata e observacion di Director di Serlimar.
