Creciente confusion… Tocante cambio pa eleccion…

Ta reina un confusion grandi encuanto e cambionan anuncia den set up di votacion den e proximo eleccion di 25 di juni, unda lo ta introduciendo cierto cambionan (digital) pa facilita e proceso. Di diferente banda redaccion di Bon Dia Aruba a haya keho, protesta y pregunta riba e asunto aki, cu ta toca diferente aspecto di e asunto.

E confusion a cuminza diasabra pasa, despues di un articulo den e vespertino Amigoe, procedente di Caribisch Netwerk, cu a tene entrevista cu hefe di Censo. Den e texto ey a relata cu lo ta bay tin cambio den e proceso na urna, unda ta introduci, entre otro, un asina yama ‘QR-code’ cu ta un codigo unico pa cada persona registra. Tambe a conta di un aparato pa scan e biyete di votacion pareu cu e ciudadano votante sali di e hokki unda el a marca su preferencia, di forma tradicional, cu un potlood cora riba e biyete. Y aki ta bin e confusion: despues e relato ta bisa: “despues di e control (cu e QR-code) e votador ta haya e biyete di votacion y ora di tira esaki den e urna, ta scan e escogencia di voto.”

Esaki a causa un avalancha di pregunta pasobra, y esunnan cu a reacciona no ta pertenece na e parti menos informa den asunto di IT y ley, ta puntra nan mes ta con bo ta bay scan un documento cu mester ta cera (dobla pa ningun hende mira loke bo a vota)? Lo mester habri e documento dilanti tur hende presente? “Si no, bo no por scan nada,” ta e reaccion cu nos a haya di varios banda. Despues a bin e preguntanan di corte legal: con bo ta kere pa bay cambia ley ainda, mientras cu tempo ta asina cortico? Ademas, ta con ta kere cu lo tin un mayoria den parlamento si den e caso di presupuesto mes nos ta tende rumor cu no ta bay tin tratamento di presupuesto 2021 mas, pasobra no tin e speranza cu lo tin un mayoria pa aproba esaki. Hasta si esey no ta berdad, ta parce nos cu pasa cualkier cambio na e momento aki ainda pa loke ta ley electoral, ta destina na muri un morto prematuro. Tirando un vistazo riba e actual ley electoral, nos ta di opinion cu sin cambio no por ehecuta e proceso di scanning aki, aparte di e pregunta ta con kier garantiza secreto di voto, e cos mas sagrado di tur eleccion.

Pero tabatin mas pregunta. Por ehemplo, si di algun forma, digital, por tin acoplamento di e QR-code unico cu e voto di e persona specifico ey? Es decir, gobierno ta bay warda tur e datonan ey di un manera, cu por ‘match’ e QR-code cu e voto particular di e persona ey? Pasobra si esey ta e caso, nos por imagina cu años despues, ora un persona ta bay na gobierno pa cualkier asunto, e ta hay’e confronta cu un NO bon cla, basa riba su voto den pasado cu no ta di agrado di e gobierno di turno?

Un biaha mas, nos no ta trece e preguntanan dilanti pasobra nos mes a sinta pensa nan; a haya nan di varios ciudadano preocupa. Y manera nos mester haci como prensa, nos a bay haci pregunta. Y awor ta bin e parti bochornoso: Nobody Home!! Pa cuminza, e presidente di Conseho Electoral ta ‘lost in action’. Aparentemente e ta bibando na Hulanda, y no ta comunica cu ningun hende. Na ultimo ora awor nos ta tende cu e ta na Aruba, pero no ta atende prensa, en todo caso no nos medio. Laga nos no bay den detaye tocante su otro funcion cu e ta dirigi ‘for di distancia’… Hopi di nos lo kier un job asina. Seguidamente, e vice-presidente ta den exterior pa su salud. Nada malo cu esey, ademas cu e tin facultad ora e presidente no t’ey, pero si esey no ta comunica…? Pa colmo, e hefe di Censo tampoco ta na Aruba, y asina di ningun manera por haya un hende sinta cu prensa y splica e asunto aki ‘de una vez por todas’.

Ademas a bin un rumor cu Aruba a haya bishita di ex-presidente di Consejo Nacional Electoral di Venezuela. Esey riba su mes no ta nada mas cu un rumor, pero averiguacion di Bon Dia Aruba na Venezuela a indica cu enberdad e señora aki awendia ta consultora den asuntonan electoral. Y tambe cu na Venezuela e periodistanan cu a acerca no tabata sa di su paradero na Venezuela. Nos ta laga e asunto ey, te ey.

Awor, e preguntanan clave: pakico nos mester tin tanto confusion y bochincha riba algo cu no mester? Pakico por ehemplo no por a tene un rueda di prensa unda a invita tur prensa, y no solamente un par di aparente ‘amigo’? Y pa seguidamente no comunica mes pasobra tur hende responsable ta den exterior? Kico ta spera anto, ta e confusuon aki bo ta haya. Y nos ta lubida e persona mas importante den esaki: nos Promer Ministro. E lo bisa cu e ta mantene distancia pasobra e ta premier, pero ta su subalterno na Censo a causa tur e baina aki, y esey si ta su responsabilidad. Pregunta final: ki dia nos ta haya e contestanan cu nos merece?