Awe Banco Central di Aruba (BCA) a publica “State of the Economy” pa e di cuater trimester di 2021. E publicacion aki ta duna un resumen di e desaroyonan economico local y internacional di e periodo aki. E puntonan mas importante relaciona cu e parti domestico ta presenta abao, incluyendo un resumen di e indicadornan economico principal.
Economia di Aruba a mehora durante 2021
Durante 2021, economia di Aruba a crece cu aproximadamente un 17,9 porciento, despues di a contrae cu un 22,3 porciento den 2020. Riba nivel di produccion, sinembargo, actividad economico den 2021 a keda bao di e nivel di 2019. E crecemento menciona anteriormente a ser impulsa principalmente door di e recuperacion fuerte den e cantidad di bishitantenan pa Aruba y nan consumo na Aruba.
Un otro motor principal tras di e expansion aki tabata e aumento den consumo local, cual tabata ser sosteni door di medidanan di apoyo di gobierno manera e Fondo di Asistencia Social di Emergencia (FASE), como tambe e programa di Loonsubsidie. Mientras cu e calculacion inicial di producto bruto domestico PBD pa e promer trimester di 2021 ta mustra un bahada compara cu e promer timester di 2020, den e siguiente trimesternan esaki a duna señalnan di recuperacion solido compara cu e aña anterior, creciendo mas di 30 porciento den cada un di e siguiente trimesternan di 2021 (Grafico 1).
Sector di turismo a presta sumamente positivo den 2021, pero no a logra alcansa nivel pre-pandemico E cantidad di bishitantenan pa Aruba a recupera crecemento durante 2021, pero no a logra jega nivelnan pre-pandemico. Den 2021, e cantidad di bishitantenan a fortalece cu 72,1 porciento compara cu e nivel na 2019. E cantidad total di anochi di turista den 2021 a crece mas cu dobel di e nivel di 2020 (Tabel 1). Entrada pa camber disponibel a surgi cu 141,9 porciento den 2021 en comparacion cu nivel di 2020, impulsa pa un nivel di tasa di ocupacion di hotel mas halto den 2021. E tasa di ocupacion di hotel a practicamente duplica di 34,9 porciento den 2020 pa 69,0 porciento den 2021. Entrada for di turismo a aumenta pa 71,5 porciento den 2021 compara cu 2020, yegando na Afl. 2.594,4 miyon na final di 2021. Durante 2021 bishitante di crucero pa Aruba a keda atras significante compara cu crecemento den 2021, ya cu e promer barco crucero a yega back Aruba dia 9 juni 2021. Den 2021 e deficit financiero a disminui, mientras cu debe publico a expande Riba e parti fiscal, e deficit financiero den 2021 (Afl. 475,2 miyon) a disminui compara cu 2020 (Afl. 813,6 miyon). E deficit aki, cu ta relativamente mas abao, ta refleha e recuperacion economico desde di dos trimester 2021. Mientras cu ingresonan publico a aumenta den 2021 compara cu 2020, gastonan publico den 2021 a keda reduci cu 16,9 porciento compara cu e aña anterior. Compara cu december 2020, debe publico a expande cu Afl. 506,8 miyon, yegando na e nivel di Afl. 5.652,5 miyon na final di 2021, mientras e peso di debe a sigui aumenta debi na e pandemia di COVID- 19. Debe publico externo a sigui crece durante 2021 jegando na 62,7 porciento di e total di debe publico. E porcion externo di debe publico a crece desde e di dos trimester di 2020 ora cu Gobierno di Aruba a cuminsa ricibi prestamonan di corto plazo for di Gobierno di Hulanda como sosten di likides.
E calculacion inicial di e porcion entre debe di gobierno y PDB tabata 108,7 porciento na final di 2021, un bahada for di 114,9 porciento na 2020. Inflacion na Aruba ta subiendo Aumento di prijs di gasolin riba mercado internacional a ocasiona aumento di inflacion na Aruba durante 2021. Na final di e di cuater trimester di 2021, e Indice di Prijs di Consumo (CPI) a aumenta cu 3,6 porciento compara cu e di cuater trimester 2020 (Grafico 2). E Indice di Prijs di Consumo a bini ta subiendo desde december 2020. E tasa di inflacion promedio anual, subiendo desde mei 2021, a jega 0,7 porciento na final di december 2021. No obstante, prijsnan di consumo na Merca a aumenta mas liher cu na Aruba, particularmente debi cu prijsnan di utilidad a keda sin cambio, creando un posicion competitivo faborabel pa Aruba compara cu Merca.
Reservanan internacional y oficial ta keda na nivel adecua conforme puntonan di referencia cu ta monitor
E nivel di reservanan internacional y oficial a keda adecua durante 2021, conforme puntonan di referencia cu Banco central ta monitor. Reservanan internacional (incluyendo diferencia di reevaluacion) a crece te Afl. 3.130,6 miyon na final di 2021 (+ Afl. 776,8 miyon) compara cu final di 2020 (Grafico 3). E aumento di reservanan internacional durante 2021 a ser impulsa primordialmente door di e prestamonan a corto plazo cu gobierno di Aruba a ricibi for di gobierno di Hulanda pa cubri necesidad grandi di likides. E prestamonan aki a ser complementa pa recuperacion di divisas stranhero relaciona cu servicionan turistico.
