Banco Central di Aruba a publica su ultimo cifranan indicando cu nan ta spera un crecemento economico real di 0.4% pe aña aki y 3.2% pa 2017.
E crecemento spera ta bou condicion si cu e inversionnan den e reapertura di e refineria lo resulta. E impacto di e reapertura pa nos economia lo ta mas grandi, e Banco si ta bisa pa motibo di inversionnan adicional for di e periodo di 2018 adelante, momento cu e refineria lo bay opera realmente. E Banco tin un crecemento economico premira di 3.2% pa otro aña.
Banco Central tambe ta informa cu instancianan financiero internacional tin un bista menos positivo riba e progreso pa 2016 pa cu e GDP nan (entrada nacional) di paisnan industrialisa. Nan ahusta e crecemento pa abou, cu lo keda mas tanto riba e nivel di 2% crecemento. E pronostico pa otro aña si ta mustra mas positivo pa Merca y Canada (mercadonan importante pa Aruba pa motibo di turismo). Europa ta mustra otro pa motibo cu e impacto di e referendum Brexit cu a haci cu e pound di Inglatera a baha considerablemente.
E cifranan ta menos positivo tambe pa nos region di Latino America pa 2016, cu excepcion di Peru. 2017 sinembargo tambe ta mustra mas positivo pe region aki, pero mester tene cuenta ainda cu e crisis economico na Venezuela cu lo keda afecta e region.
E unico paisnan afo cu ta mustra tin crecemento significante positivo ta esun di China y di India.
Inflacion
E inflacion pronostica pa mayoria di e economianan avansa den mundo ta keda abou. Solamente na Latino America e institutonan financiero ta premira cu e inflacion lo subi, specialmente den paisnan Argentina, Brazil y Venezuela.
Azeta
Prijsnan di azeta lo bay subi final di 2016 pa 51 dollar pa bari. Pa otro aña tin indicacion cu nan lo bay subi hasta mas, cual ta positivo pa paisnan depende di azeta, manera Venezuela. Prijs di oro tambe lo sigui subi den e siguiente periodo.
