Economia di Aruba a sigui riba un rumbo di crecemento maera anticipa, pero na mes momento aumento di entrada di BBO tabata ms impresionante ainda. Esey por destila for di cifranan di Banco Central di Aruba, cu a divulga cifra di operacion gubernamental di promer mitar di 2023. Esakinan en compracion cu e mesun periodo di 2022 ta mustra entre otro lo siguiente:
Loonbelasting: + 9,6%: Afl. 108,3 miyon (2022) vs Afl. 117,9 miyon (2023)
Impuesto di importacion: +19,5%: Afl. 85,1 miyon (2022) vs Afl. 101,7 miyon (2023)
BBO/BAVP): + 47,3%: Afl. 108,9 miyon (2022) vs Afl. 160,5 miyon (2023).
E aumento di e ultimo cifra aki ta debi na dos factor: uno ta e crecemento economico cual ta representa tambe den e otro cifranan cu ta indica progreso economico segun entrada pa gobierno. E otro factor ta e aumento di e BBO/BAVP entrante 1 di januari 2023 cu a contribui na e aumento total aki, di casi 50% compara cu e total ricibi aña pasa den e mesun periodo.
BBO na frontera
E aumento sustancial di BBO/BAVP mustra aki no ta encera e extra ingreso cu lo bin di e introduccion di BBO/BAVP na frontera, cu pa promer biaha lo aparece den e resumen di luna di september, cu no a keda publica ainda.
Entrada general di gobierno den e periodo referi a aumenta cu Afl. 199,3 miyon (30,9%), mientras cu entrada di impuesto a aumenta cu Afl. 174 miyon (29,9%). Entrada total di promer parti di 2023 a duna gobierno Afl. 842,9 miyon, mientras Afl. 755,1 miyon tabata e total di impuesto. Si e tendencia economico aki continua, cu e adicion di e BBO na frontera na augustus pa resto di aña, gobierno lo por yega sin problema na e proyeccion pa entrada total (y total pa impuesto) pa 2023 y hasta por surpasa e expectativanan cu un nivel di entrada total di riba Afl. 1.600 miyon, cu tabata anticipa pa aña 2024. Entrada di impuesto lo ta riba Afl. 1.500 miyon, loke ta mas halto cu e total di impuesto proyecta pa 2024 den e presupuesto multi-anual. Mas detaye den un siguiente edicion.
