Awe Banco Central di Aruba (BCA) a publica su ‘Economic Outlook’, conteniendo un update pa 2022. Tambe, un revision pa 2021 ta inclui.
E recuperacion fuerte den e sector turistico a hiba un expansion significante den actividad economico den 2021.
Den e dicho aña, Producto Domestico Bruto (PDB) ta calcula di a crece cu 17,2 porciento den termino real (19,8 porciento den termino nominal), compara cu un bahada real di 18.6 porciento den 2020 (22.5 porciento den termino real). No obstante e aumento, PDB real den 2021 ta 95.4 porciento di e nivel di 2019. E disponibilidad di e programanan di asistencia financiero, esta e subsidio di salario y FASE, di Gobierno di Aruba (GoA) tambe a contribui positivamente na e resurgimento den PDB, ya cu nan a yuda pusha consumo priva. Ademas, un mehoracion den inversion priva (aunke na un grado menor) a hunga un rol den e rebote di PDB den 2021.
Pa 2022, e estimado di crecemento economico — un crecemento ‘baseline’ di 2,1 porciento den termino real y 8,3 porciento den termino nominal – ta depende pa un gran parti riba e desaroyo positivo den e sector turistico.
Proyeccionnan actual ta mustra cu e expansion den bishitantenan procedente di exterior lo varia entre 12,4 porciento (den un scenario pesimista) y 40,1 porciento (den un scenario optimista), cu un subida di 30,4 porciento den e baseline scenario compara cu e aña anterior. Sinembargo, anticipando un normalisacion gradual den e cantidad di placa cu turistanan ta gasta diariamente, credito atribui na turismo ta premira di crece relativamente menos na 2022, esta 14,3 porciento den termino nominal, cu ta mas abou cu e 65.5 porciento den 2021. Dependiendo di cua scenario tuma lugar na 2022, inversion priva por pusha e economia un tiki mas halto. Di otro banda, consumo priva den termino real ta anticipa di keda generalmente flat den 2022, a consecuencia di un nivel relativamente mas halto di inflacion anticipa, esta 7,1 porciento.
E publicacion completo ta disponibel riba nos website (www.cbaruba.org)
