Presidente di Camara di Comercio y Industria di Aruba (KvK), Daphne Agius Cesareo-Lejuez ta considera importante pa sostene un reunion pronto cu Aruparking pa sigui evalua e situacion di paga pa parkeer den e area di centro di ciudad. KvK kier sa si tin espacio pa bin cu cierto cambio of ahustacion. Esaki ta e combersacion cu nan ta desea di hiba cu Aruparking.
El a laga sa comerciantenan den centro di ciudad tabata e confiansa di suministra KvK nan cifranan di benta cu ta refleha cu e caida ta drastico. “Bo ta puntra bo mes kico ta e problema?”, sra. Cesareo-Lejuez a bisa.
E pregunta aki ta surgi ya cu Arubaparking ta mustra cu tin un crecemento riba e uzo di parkeer paga, pero di otro banda esaki no ta wordo refleha den e cifra di benta di e comerciantenan den e area aki.
El a bisa cu KvK a haya e mesun grafico cu ta ilustra cu ta indica entre 5 pa 6 mil transaccion riba uzo di parkeer meter. KvK lo desea mas informacion detaya riba entre otro ki dia, ki ora y cua luga ta esun mas uza, ya cu e tipo di dato aki nan no a haya specificamente fei Aruparking.
Tampoco algun otro cifra cu KvK a pidi pa asina haya un splicacion di Aruparking riba si nan a yega na nan proposito pa por subsidia parcialmente Arubus.
Competencia igual
Sra. Cesareo-Lejuez a laga sa cu pa bo por competi cu e otro tiendanan y centronan comercial pafo di centro di ciudad mester crea un situacion igual y nan ta kere cu esaki ta e punto central cu e combersacion mester wordo hiba. Ya cu e ta kere cu actualmente esaki no ta e caso.
Encuanto pa e negoshi den centro di ciudad lo por keda habri te mas laat di anochi, KvK ta considera cu sin duda esaki ta un tema cu tambe nan por wordo papia. Pero si no tin niun atractivo, tampoco transporte den e oranan aki, e ta duda cu esaki lo por trece un diferencia.
E ta kere cu e clave ta pa crea un nivel cu tur area comercial por competi den e mesun nivel di igualdad. E ta haya cu e puntonan aki lo forma parti di nan agenda ora cu nan lo sinta proximamente cu gobierno. “E combersacion mester wordo hiba. E mester keda sano…”, el a bisa.
