(AP) – Akira Toriyama, e creador di Dragon Ball, entre otro anime popular, cu tabata sumamente influencial a fayece, su studio a publica diabierna, e tabatin 68 aña di edad.
Toriyama su serie di manga Dragon Ball, cual a cuminsa den 1984, a bende miyones di copia globalmente y a ser adapta y converti den programanan di television anima, video game y peliculanan sumamente popular. Toriyama a fayece dia 1 di maart a causa di un cuahulo di sanger den su cerebro, Bird Studio a informa. “E tabata trahando cu hopi entusiasmo riba varios proyecto y te ainda tabatin hopi cu e tabata kier a logra,” e studio a skirbi.
Un adaptacion nobo di Toriyama su “Sand Land”, un storia di aventura den desierto publica den aña 2000 y despues adapta den aña 2023 den un pelicula, lo ser lansa riba Disney+ proximamente. Mensahenan di condolencia y luto for di otro creadornan ademas di fanaticonan a yena rednan social.
Eiichiro Oda, creador di e manga “One Piece,” a bisa cu Toriyama su presencia tabata manera un “mata grandi” pa artistanan mas hoben. El a mustra nos tur loke manga por haci, un soño pa por drenta den otro mundo,” Oda a bisa den su declaracion, agregando cu su fayecimento ta laga “un buraco demasiado grandi pa yena.”
Bird Studio a duna danki na fanaticonan pa mas di 40 aña di sosten. “Nos ta spera cu Akira Toriyama su mundo unico di creacion lo sigui ser stima pa tur hende pa semper.”
Naci na Aichi Prefecture na Hapon den aña 1955, Toriyama a haci su debut cu e manga Wonder Island den aña 1978, publica den e revista Weekly Shonen jump. Su serie Dr. Slump, cual a cuminsa den aña 1980 tabata su prome hit grandi. Esaki a converti su persona den un celebridad, pero Toriyama a evita ta den bista publico. Na aña 1982, el a conta NHK cu “mi kier djis keda skirbi manga.”
