Sr. Anselmo Pontilius a vocifera su preocupacion como mediador di gobierno riba e indice halto di desempleo cerca nos poblacion hoben. Esaki ta un punto di atencion cu el a trece dilanti recientemente durante su reunion di consulta cerca Gobernador di Aruba.
E ta haya cu particularmente mester aregla e situacion di comercio pa facilita e proceso di reclutamento di mas hoben den nos mercado laboral.
Na Hulanda pa ehempel e sector di dunadonan di trabou ta purba haya un tipo di areglo fiscal temporario pa crea espacio y incentivo pa tuma un cantidad di hoben na nan servicio. Pero no solamente nan ta tuma e trahadonan jong aki sin experiencia, sino cu nan ta prepara nan pa medio di un tipo di capacitacion of training pa nan. Pa asina den un corto tempo nan por domina un of otro funcion caba. Sr. Pontilius ta considera e aspecto aki hopi importante.
E no ta descarta e posibilidad di crea un of otro sorto di fondo pa percura den e tipo di preparacion laboral aki. “Pasobra e ta un inversion cu nos ta haci pa nos pais percura pa e hoben ey asumi un responsabilidad. Nan no por ta ariba caya”, el a bisa.
