CPI pa e periodo October 2023-October 2024; CBS: Den ultimo 12 luna, 9 di 12 sector a registra aumento di prijs

Recientemente, Bureau Central di Estadistica a publica su Indice di Prijs di consumidor pa e periodo di october 2023 te october 2024, den cual a resalta cu nuebe di 12 sector a registra un aumento di prijs.

Indice di Prijs di Consumo

Den e ultimo diesdos (12) luna, e CPI a subi cu 1.0%, unda nuebe (9) di e diesdos (12) sector a registra aumento di prijs. E aumentonan cu tabatin e mayor efecto riba e CPI a wordo registra pa e sectornan di “Comunicacion” (6.6%), “Restante bienes y servicio” (3.1%), “Cuminda y bebida no-alcoholico” (2.5%), Paña y sapato” (8.1%), “Restaurant y hotel” (2.7%) y “Vivienda” (0.5%) causando un efecto di respectivamente, 0.55, 0.36, 0.29, 0.18, 013 y 0.13 ppt. E aumentonan den e restante sectornan a contribui cu un efecto di 0.05 ppt riba e CPI di October 2023 – October 2024.

E aumentonan aki a wordo contraresta parcialmente door di principalmente un caida den e indice di e sector di “Transporte” (-4.6%), cu a contribui cu un efecto di -0.62 ppt. E caida den e sector restante a contribui cu un efecto di -0.10 ppt riba e CPI di October 2023 – October 2024.

E aumento den e sector di “Comunicacion” a wordo causa principalmente door di un aumento di 6.1% den e categoria “Servicio di telefon y fax”, causando un efecto di 0.48 ppt. E aumento den e sector di “Restante bienes y servicio” a wordo causa door di principalmente un aumento den e categoria “Otro articulonan personal” (26.1%), causando un efecto di 0.27. E aumento den e sector di “Cuminda y bebida no-alcoholico” a wordo causa principalmente door di un aumento den e categoria “Cuminda” (2.1%), causando un efecto di 0.21 ppt. E aumento den e sector di “Paña y sapato” a wordo causa door di un aumento di 12.4% den e categoria “Paña”, causando un efecto di 0.21 ppt. E aumento den e sector di “Restaurant y hotel” a wordo causa principalmente door di un aumento den e categoria “Cuminda pafo di cas” (2.7%), causando un efecto di 0.13 ppt. E aumento den e sector di “Vivienda” a wordo causa principalmente door di un aumento den e categoria “Huur di vivienda” (1.5%), causando un efecto di 0.10 ppt.

E caida den e sector di “Transporte” a wordo causa principalmente door di un caida di 9.7% den e categoria “Gasto relaciona cu uso di vehiculo di transporte personal”, causando un efecto di -0.87 ppt.

Canasta di consumo

Den e ultimo aña cu a pasa 50.5% di productonan den e canasta di consumo di e CPI a conoce un aumento di prijs causando un efecto di 3.01 ppt, mientras cu 38.0% ta mustra un caida di prijs, cu a contribui cu un efecto di -2.04 ppt y pa e restante 11.5% no tabatin cambio den prijs. E indicenan di “Bienes” (0.7%) y

“Servicionan” (1.3%) a registra aumentonan, causando un efecto di respectivamente, 0.41 y 0.56 ppt.

Bestaansminimum

Den e ultimo diesdos (12) luna e bestaansminimum pa un hogar consistiendo di dos (2) adulto y dos (2) mucha (edad 0-15 aña) a registra un aumento di Afl. 88, di Afl. 5,432 na October 2023 pa Afl. 5,520 na October 2024. E aumento aki a wordo causa principalmente door di aumentonan den e sectornan di “Cuminda y

bebida no-alcoholico” (Afl. 56) y “Paña y sapato” (Afl. 19).

Cambio di prijs di petroleo, utilidad, gasolin y diesel E prijs promedio pa bari di petroleo a conoce un caida di US$ 13.46 (-15.7%) di US$ 85.94 na October 2023 pa US$ 72.48 na October 2024.

E indice di Energia a baha cu 5.2% den e ultimo aña y a causa un efecto di -0.91 ppt. E indicenan di “Gasolin” (-15.5%) y “Diesel” (-22.8%) a registra caida, causando un efecto di respectivamente -0.82 y -0.09 ppt riba e CPI. E indicenan di “Electricidad” y “Awa” no a registra cambio. E restante 404 bienes y servicio hunto, a conoce un aumento di 2.3% y tabatin hunto un efecto di 1.87 ppt.

Cambio di prijs di Cuminda y servicio di catering

Den e ultimo diesdos (12) luna e indice di “Cuminda & servicio di catering” a subi cu 2.5%. E indice di “Cuminda na cas” tambe a conoce un aumento di 2.5%, unda ocho (8) di e diesun (11) indicenan di e gruponan di “Cuminda na cas” a subi durante e periodo aki.

E indicenan di “Fruta” y “Bebida no-alcoholico” a conoce un aumento cada uno di 5.3%, e aumentonan mas grandi entre e gruponan di “Cuminda na cas”. Ademas otro aumentonan significante a wordo registra den e indicenan di “Lechi, keshi y webo” (4.6%), “Restante productonan pa alimentacion” (3.2%), “Carni” (1.8%) y “Sucu, jam y otro tipo di cos dushi” (1.7%). E caida mas grandi durante e periodo aki a wordo registra den e indice di “Pisca y otro cuminda di lama” (-3.0%). E indice di “Cuminda pafo di cas” a registra un aumento di 2.7% den e ultimo diesdos (12) luna.