Recientemente, Oficina Central di Estadistica a publica e Indice di Prijs di Consumo pa e periodo di november 2023 te november 2024.
Indice di Prijs di Consumo
Den e ultimo diesdos (12) lunanan, e CPI a subi cu 0.8%, unda seis (6) di e diesdos (12) sector a registra aumento di prijs. E aumentonan cu tabatin e mayor efecto riba e CPI a wordo registra pa e sectornan di “Transporte” (2.9%), “Cuminda y bebida no-alcoholico” (2.7%), “Restante bienes y servicio” (2.6%) y “Restaurant y hotel” (3.2%), causando un efecto di respectivamente, 0.37, 0.32, 0.31 y 0.15 ppt. E aumentonan den e restante sectornan a contribui cu un efecto di 0.15 ppt riba e CPI di November 2023 – November 2024.
E aumentonan aki a wordo contraresta parcialmente door di principalmente caida den e indicenan di e sector di “Recreacion y cultura” (-2.8%) y “Vivienda” (-0.7%), cu a contribui cu un efecto di respectivamente -0.25 y -0.18 ppt. E caidanan den e sectornan restante a contribui cu un efecto di -0.03 ppt riba e CPI di
November 2023 – November 2024.
E aumento den e sector di “Transporte” a wordo causa principalmente door di un aumento di 10.7% den e categoria “Compra di vehiculo”, causando un efecto di 0.44 ppt. E aumento den e sector di “Cuminda y bebida no-alcoholico” a wordo causa door di principalmente un aumento den e categoria “Cuminda” (2.7%), causando un efecto di 0.27. E aumento den e sector di “Restante bienes y servicio” a wordo causa principalmente door di un aumento di 24.8% den e categoria “Otro articulonan personal”, causando un efecto di 0.26 ppt. E aumento den e sector di “Restaurant y hotel” a wordo causa door di un aumento den e categoria “Cuminda pafo di cas” (2.6%), causando un efecto di 0.12 ppt.
E caida den e sector di “Recreacion y cultura” a wordo causa principalmente door di un caida di 5.7% den e categoria “Vacacion”, causando un efecto di -0.14 ppt. E caida den e sector di “Vivienda” a wordo causa door di un caida den e categoria “Electricidad, gas y otro combustible” (-3.8%), causando un efecto di -0.31.
Canasta di consumo
Den e ultimo aña cu a pasa 48.5% di productonan den e canasta di consumo di e CPI a conoce un aumento di prijs causando un efecto di 2.57 ppt, mientras cu 39.7% ta mustra un caida di prijs, cu a contribui cu un efecto di -1.73 ppt y pa e restante 11.8% no tabatin cambio den prijs. E indicenan di “Bienes” (0.5%) y “Servicionan” (1.3%) a registra aumento, causando un efecto di respectivamente, 0.29 y 0.55 ppt.
Bestaansminimum
Den e ultimo diesdos (12) lunanan e bestaansminimum pa un hogar consistiendo di dos (2) adulto y dos (2) mucha (edad 0-15 aña) a registra un aumento di Afl. 65, di Afl. 5,447 na November 2023 pa Afl. 5,512 na November 2024. E aumento aki a wordo causa principalmente door di un aumento den e sector di “Cuminda y bebida no-alcoholico” (Afl. 62).
Cambio di prijs di petroleo, utilidad, gasolin y diesel
E prijs promedio pa bari di petroleo a conoce un caida di US$ 8.88 (-11.3%) di US$ 78.48 na November 2023 pa US$ 69.60 na November 2024.
E indice di Energia a baha cu 3.3% den e ultimo aña y a causa un efecto di -0.56 ppt. E indicenan di “Gasolin” (-4.1%) y “Diesel” (-16.8%) a registra caida, causando un efecto di respectivamente -0.19 y -0.06 ppt riba e CPI. E indice di “Electricidad” a registra un caida di 4.0%, causando un efecto di -0.31 ppt, mientras cu e indice di “Awa” no a registra cambio. E restante 404 bienes y servicio hunto, a conoce un aumento di 1.7% y tabatin hunto un efecto di 1.40 ppt.
Cambio di prijs di Cuminda y servicio di catering
Den e ultimo diesdos (12) lunanan e indice di “Cuminda & servicio di catering” a subi cu 2.7%. E indice di “Cuminda na cas” tambe a conoce un aumento di 2.7%, unda nuebe (9) di e diesun (11) indice di e gruponan di “Cuminda na cas” a subi durante e periodo aki.
E indice di “Lechi, keshi y webo” a conoce un aumento di 5.6%, e aumento mas grandi entre e gruponan di “Cuminda na cas”. Ademas, otro aumentonan significante a wordo registra den e indicenan di “Berdura” (3.4%), “Bebida no-alcoholico” (3.3%), “Restante productonan pa alimentacion” (2.9%), “Carni” (2.7%) y
“Fruta” (2.6%). E caida mas grandi durante e periodo aki a wordo registra den e indice di “Batata, yuca y batata dushi” (-0.7%). E indice di “Cuminda pafo di cas” a registra un aumento di 2.6% den e ultimo diesdos (12) luna.
