Recientemente, Oficina Central di Estadistica (CBS) a publica e Indice di Prijs di Consumo pa december 2024. Den esaki, a destaca e CPI pa e ultimo 12 luna, di december 2023 pa december 2024.

Indice di Prijs di Consumo

Den e ultimo diesdos (12) lunanan, e CPI a subi cu 0.3%, unda shete (7) di e diesdos (12) sectornan a registra subida di prijs.

E subidanan cu tabatin e mayor efecto riba e CPI a wordo registra pa e sectornan di “Transporte” (2.9%), “Cuminda y bebida noalcoholico” (2.6%), “Restaurant y hotel” (3.2%) y “Restante bienes y servicio” (1.3%), causando un efecto di respectivamente, 0.36, 0.30, 0.15 y 0.15 ppt.

E subidanan den e restante sectornan a contribui cu un efecto di 0.06 ppt riba e CPI di December 2023 – December 2024. E subidanan aki a wordo contraresta parcialmente door di principalmente un caida den e indicenan di e sector di “Recreacion y cultura” (-2.8%) y “Vivienda” (-0.7%), cu a contribui cu un efecto di respectivamente -0.25 y -0.18 ppt.

E caidanan den e sectornan restante a contribui cu un efecto di -0.03 ppt riba e CPI di December 2023 – December 2024. E subida den e sector di “Transporte” a wordo causa principalmente door di un subida di 10.7% den e categoria “Compra di vehiculo”, causando un efecto di 0.44 ppt.

E subida den e sector di “Cuminda y bebida no-alcoholico” a wordo causa door di principalmente un subida den e categoria “Cuminda” (2.7%), causando un efecto di 0.27. E subida den e sector di “Restante bienes y servicio” a wordo causa principalmente door di un subida di 24.8% den e categoria “Otro articulonan personal”, causando un efecto di 0.26 ppt.

E subida den e sector di “Restaurant y hotel” a wordo causa door di un subida den e categoria “Cuminda pafo di cas” (2.6%), causando un efecto di 0.12 ppt. E caida den e sector di “Recreacion y cultura” a wordo causa principalmente door di un caida di 5.2% den e categoria “Vacacion”, causando un efecto di -0.48 ppt.

Canasta di consumo

Den e ultimo aña cu a pasa 47.3% di productonan den e canasta di consumo di e CPI a conoce un aumento di prijs causando un efecto di 2.27 ppt, mientras cu 40.9% ta mustra un caida di prijs, cu a contribui cu un efecto di -2.01 ppt y pa e restante 11.8% no tabatin cambio den prijs.

E indicenan di “Bienes” (0.1%) y “Servicionan” (0.5%) a registra subidanan, causando un efecto di respectivamente, 0.06 y 0.20 ppt.

Bestaansminimum

Den e ultimo diesdos (12) lunanan e bestaansminimum pa un hogar consistiendo di dos (2) adulto y dos (2) mucha (edad 0-15 aña) a registra un subida di Afl. 51, di Afl. 5,460 na December 2023 pa Afl. 5,511 na December 2024.

E subida aki a wordo causa principalmente door di un subida den e sector di “Cuminda y bebida no-alcoholico” (Afl. 58).

Cambio di prijs di petroleo, utilidad, gasolin y diesel

E prijs promedio pa bari di petroleo a conoce un caida di US$ 2.67 (-3.7%) di US$ 72.61 na December 2023 pa US$ 69.94 na December 2024. E indice di Energia a baha cu 2.5% den e ultimo aña y a causa un efecto di -0.41 ppt.

E indicenan di “Gasolin” (-1.7%) y “Diesel” (-9.5%) a registra caida, causando un efecto di respectivamente -0.08 y -0.03 ppt riba e CPI. E indice di “Electricidad” a registra un caida di 4.0%, causando un efecto di -0.31 ppt, mientras cu e indice di “Awa” no a registra cambio.

E restante 404 bienes y servicio hunto, a conoce un subida di 0.8% y tabatin hunto un efecto di 0.68 ppt.

Cambio di prijs di Cuminda y servicio di catering

Den e ultimo diesdos (12) lunanan e indice di “Cuminda & servicio di catering” a subi cu 2.5%. E indice di “Cuminda na cas” a conoce un subida di 2.6%, unda ocho (8) di e diesun (11) indicenan di e gruponan di “Cuminda na cas” a subi durante e periodo aki. E indice di “Fruta” a conoce un subida di 5.6%, e subida mas grandi entre e gruponan di “Cuminda na cas”.

Ademas, otro subidanan significante a wordo registra den e indicenan di “Lechi, keshi y webo” (4.2%), “Carni” (3.4%), “Batata, yuca y batata dushi” (2.7%), “Restante productonan pa alimentacion” (2.6%) y “Bebida no-alcoholico” (2.5%). E caida mas grandi durante e periodo aki a wordo registra den e indice di “Pisca y otro cuminda di lama” (-0.9%). E indice di “Cuminda pafo di cas” a registra un subida di 2.4% den e ultimo diesdos (12) lunanan.

Den e ultimo diesdos (12) lunanan, “Cuminda na cas” y “Cuminda pafo di cas” como grupo, tabatin un subida di prijs di 2.5% y hunto tabatin un influencia di 0.42 ppt riba e CPI, mientras cu e restante bienes y servicio hunto a experencia un caida di prijs di 0.2% y tabatin un efecto di -0.15 ppt riba e CPI.