CPI juli 2023: 7 di 12 sector a registra aumento di prijs

Oficina Central di Estadistica ta presenta e resultadonan principal di e Indice di Prijs di Consumo (CPI) pa luna  di Juli 2023. 

E CPI pa luna di Juli 2023 (106.20) practicamente no a registra cambio compara cu e indice di Juni 2023 (106.20). E cambio di e CPI pa e ultimo diesdos (12) luna (Juli 2022 te cu  Juli 2023) ta 1.7%, un caida di 4.3 punto di porcentahe (ppt) compara cu e periodo corespondiente di aña pasa (6.0%).

E promedio anual (ultimo 24 luna) di e tasa di inflacion pa e  periodonan di Juli 2021 te cu Juli 2022 y Juli 2022 te cu Juli 2023 ta 5.6%, un subida di 1.9 ppt compara cu e 3.7% registra den e  periodonan di Juli 2020 te cu Juli 2021 y Juli 2021 te cu Juli 2022.

Durante e luna aki, shete (7) di e diesdos (12) sector a registra aumento di prijs. E aumento cu tabatin e mayor efecto riba e CPI a wordo registra pa e sectornan di “Comunicacion” (12.9%) y “Mobilario” (1.6%), causando un efecto di respectivamente, 0.97 y 0.14 ppt. E aumento den e sectornan restante a contribui cu un efecto di 0.14 ppt riba e CPI di Juli 2023.

E aumento aki a wordo contraresta parcialmente door di principalmente caida den e indice di e sector di “Transporte” (-7.9%) cu a contribui cu un efecto di -1.12 ppt riba e CPI di Juli 2023. E caidanan den e restante sectornan a contribui cu un efecto di -0.12 ppt riba e CPI di Juli 2023. E aumento den e sector di “Comunicacion” a wordo causa door di un aumento di 14.2% den e categoria “Servicio di telefon y fax”, causando un efecto di 1.01 ppt.

E aumento den e sector di “Mobilario” a wordo causa principalmente door di un subida den e categoria “Mueble y accesorionan, tapijt y otro tipo di material pa vloer” (7.3%), causando un efecto di 0.07 ppt. E caida den e sector di “Transporte” a wordo causa door di un caida den e categoria “Compra di vehiculo” (-22.5%), causando un efecto di -1.18 ppt.

Canasta di consumo

E canasta di consumo di e CPI ta consisti di 408 bienes y servicionan. Compara cu Juni 2023, 49.3% di e bienes y servicionan aki a conoce un aumento di prijs causando un efecto di 1.84 ppt, mientras cu 35.5% ta mustra un caida di prijs, cu a contribui cu un efecto di -1.83 ppt y pa e restante 15.2% no tabatin cambio den prijs.

Prijsnan di bienes a baha cu 1.8% y a causa un efecto di -1.06 ppt. Prijsnan di servicionan a conoce un aumento di 2.6% y a causa un efecto di 1.07 ppt riba CPI di Juli 2023.