Recientemente, Oficina Central di Estadistica a publica e Indice di Prijs di Consumo pa luna di Februari 2025, cu a registra un aumento di 0.4 porciento compara cu januari 2025. Ademas, siete di 12 sector a registra un aumento di prijs.

E CPI pa luna di Februari 2025 ta 109.09, loke ta representa un aumento di 0.4% compara cu e indice di Januari 2025 (108.65).

E cambio di e CPI pa e ultimo diesdos (12) luna (Februari 2024 te cu Februari 2025) ta 0.5%, un reduccion di 0.4 punto di porcentahe (ppt) compara cu e periodo corespondiente di aña pasa (0.9%).

E promedio anual (ultimo 24 luna) di e tasa di inflacion pa e periodonan di Februari 2022 te cu Februari 2023 y Februari 2024 te cu Februari 2025 ta 1.6%, un reduccion di 0.8 ppt compara cu e 2.4% registra den e periodonan di Februari 2021 te cu Februari 2022 y Februari 2023 te cu Februari 2024.

Durante e luna aki, shete (7) di e diesdos (12) sectornan a registra aumento di prijs. E aumentonan cu tabatin e mayor efecto riba e CPI a wordo registra pa e sectornan di “Transporte” (2.0%) y “Vivienda” (0.5%), causando un efecto di respectivamente, 0.25 y 0.12 ppt. E aumentonan den e sectornan restante a contribui cu un efecto di 0.22 ppt riba e CPI di Februari 2025.

E aumentonan aki a wordo contraresta parcialmente door di principalmente un reduccion den e indice di e sector di “Mobilario” (-0.7%) cu a contribui cu un efecto di -0.06 ppt riba e CPI di Februari 2025. E reduccionnan den e sectornan restante a contribui cu un efecto di -0.12 ppt riba e CPI di Februari 2025.

E aumento den e sector di “Transporte” a wordo causa principalmente door di un aumento di 2.5% den e categoria “Gasto relaciona cu uso di vehiculo di transporte personal”, causando un efecto di 0.20 ppt. E aumento den e sector di “Vivienda” a wordo causa principalmente door di un aumento den e categoria “Electricidad, gas y otro combustible” (1.5%), causando un efecto di 0.12 ppt.

E reduccion den e sector di “Mobilario” a wordo causa principalmente door di un reduccion den e categoria “Aparato pa uso domestico” (-2.7%), causando un efecto di -0.08 ppt.

Canasta di consumo

E canasta di consumo di e CPI ta consisti di 408 bienes y servicionan. Compara cu Januari 2025, 44.6% di e bienes y servicionan aki a conoce un aumento di prijs causando un efecto di 1.10 ppt, mientras cu 38.5% ta mustra un reduccion di prijs, cu a contribui cu un efecto di -0.69 ppt y pa e restante 16.9% no tabatin cambio den prijs. Prijsnan di bienes a subi cu 0.7% y a causa un efecto di 0.42 ppt. Prijsnan di servicionan a conoce un reduccion leve di 0.03% y a causa un efecto di -0.01 ppt riba e CPI di Februari 2025.

Core inflation

E CPIC (core inflation) – CPI excluyendo e efecto di energia y cuminda – a registra na Februari 2025 un aumento di 2.4%. E indice di energia – cu ta consisti di e productonan: electricidad, awa, gasolin y diesel – a registra un reduccion di 2.2%. E indice di cuminda a registra un aumento di 2.1%.

Kico ta CPIC?

E CPIC (core inflation) of e inflacion basico ta un porcion di e inflacion unda cierto articulonan cu tin comementonan di prijsnan volatil ta wordo exclui, manera productonan alimenticio y energetico. Na momento cu e inflacion basico wordo calcula, e componentenan mas volatil ta wordo elimina di e inflacion total. E indice di e inflacion basico ta sirbi pa evalua e tendencia riba medio y largo plazo di e nivel general di prijsnan. Pa ahusta maneho monetario, hopi economista ta enfoca riba e tasa di e inflacion basico, como cu esaki ta permiti un evaluacion mas profundo di e procesonan di inflacion reciente den e economia.

E CPIC ta wordo calcula door di compara e indice promedio di e periodo di e 12 luna mas reciente cu e promedio di e periodo di 12 luna anterior (Promedio anual).

Elaboracion di un CPI tin tres meta principal.

1. Como un metodo di calculo pa compensa empleadonan pa motibo di perdida di poder di compra, ahustando nan salarionan, cu e proporcion di e cambio porcentual di CPI, locual ta conoci como indexering.

2. Como un mecanismo pa ahusta componentenan di e producto domestico bruto (GDP) di termino nominal pa termino real den Cuentanan Nacional. (Por ehempel door di elimina e efectonan di cambionan di prijs di e balor di consumo)

3. Como un medio pa gobiernonan y/of banconan central fiha obhetivonan inflacionario.