Despues di un periodo di calma relativo, cu hopi positivismo cu nos economia lo por cuminza recupera, awe ta reina un ambiente di panico y di haya nos tira ‘back to square one’. Logicamente cu nos no ta bay resolve nada cu e ambiente aki, asina ta: mantene cabez friu mientras cu e curazon por ta ardiente.

Esaki ta conta tanto pa nos autoridadnan como pa henter pueblo, pasobra e cos aki no ta algo cu gobierno ta resolve pa nos. Ta nos tur mester mustra e disciplina necesario pa nos por domina e virus mas pronto cu ta posible. Y den esaki tin na e momento aki un motibo hopi urgente pa cumpli: nos no por afford un lockdown completo atrobe! Claro cu si mester, mester, pero nos mester trata di evita esaki a todo costo. Pasobra un segundo lockdown lo haci cu hasta e scenario mas negativo cu a pinta te awor pa nos economia, lo parce sumamente optimista cu loke realmente lo ta e situacion pa fin di aña. Y esey caba cu e perspectiva cu nos partner economico principal, Estadonan Uni, ta bayendo di mal en peor na man di un di e idiotanan mas grandi cu a nace den siglo pasa, cu e resultado cu posiblemente nan tambe lo ta cerca di un lockdown atrobe.

En todo caso nos no ta den e situacion ey, cu nos maximo autoridadnan ignorando e situacion, aunke lo bin critica cu a bira demasiado optimista. E maneho cu mester hiba awor pa nos domina e situacion di salud publico atrobe, ta trece cune pregunta, interogante, tocante kico ta bay pasa riba tereno di maneho di e situacion financiero y economico. Nos ta sinti cu gobierno di Aruba ta buscando un forma pa posterga e momento cu mester bisa Hulanda si of no pa loke ta nan exigencianan, mientras ta sondea opcion pa haya otro financiamento, pa no yega na e momento cu ya ta imposible pa keda wanta e situacion sin ayudo Hulandes. Esey awor por cambia totalmente, pasobra si nos haya un situacion cu ta requeri un lockdown, anto ta bira necesario pa simplemente acepta e ayudo, sin mahamento tocante ‘autonomia’ pasobra di autonomia nos no por come. Ademas tin e temornan den sector priva, cu si e subsidio di salario desaparece, esaki lo causa un avalancha di negoshi cu no ta wanta e presion mas. Nos a haya e advertencianan ey caba di varios gremio empresarial, y no tin motibo pa kere cu nan ta exagera. Y e perspectiva cu e crisis aki ta bay dura mas largo ainda, ya ta pone nos den otro aña promer nos ta bay mira algo di recuperacion.

Tur esaki ta pone mas presion tambe riba e situacion den seno di gobierno, unda supuestamente nos gobierno “ta tranca”, pa usa palabra di nos promer Ministro mes di dialuna pasa durante rueda di prensa. Nos no a yega na puntra ta ken tin e conseho di ministro tranca, cu no por ta e ministro encarga cu Infrastructura, pasobra esey a mira su cartera crusa mesa recientemente y ta bao custodia di Promer Ministro mes. Ta ken anto? E colega di Husticia cu no ta bin Conseho di Ministro? Anto ta e ta e problema cu mester bay. Nos ta paga pa un ministro pa haci su trabao y no pa menasa cu boycotea trabao di nos pais na e momento aki. Por ta cu e tin apoyo di otro colega cu ta hunto cune den e problemanan cu tin, manera e asunto di spearfishing y Parke Nacional. Nan tur mester ‘grow up’ y realisa nan mes ta na unda e pais aki ta actualmente. Benta gobierno abao den e situacion aki, sigur cu e emergencia cu a surgi den ultimo dianan, absolutamente no ta hustifica continua e conflicto aki di e manera aki, mientras nos mester di un gabinete cu ta resolve problema, unda cada un ta traha.

Mas tension ta bin tambe di e ponencia di e partido mas grandi den e coalicion, cu di ningun manera ta bay paga pa un ministro nobo, ya cu mester paga un cu a sali caba, y tin otro pendiente. Nos tin e impresion cu e asunto no ta trata solamente e aspecto financiero, pero tambe e rabia pa e chantahe di parti di e partner menor ta hunga un papel grandi aki. Menasa e ruman grandi nunca ta algo cu ta tuma cu agrado y esey por conduci na un situacion cu ta pone nos ta ‘end up’ toch sin gobierno. Loke ta mas necesario cu nunca na e momento aki anto, ta sano huicio, algo cu nos tin basta tempo sin mira, sigur den e conflicto den e partido chikito aki. Pero tin un motibo mas pa pone e asunto aki un banda. Esey ta cu un gobierno cu ta tambalea dificilmente por bisa su ciudadanonan cu nan mester cumpli. Cumpli cu tur regla di distanciamento y higiena, busca solucion pa nan desempleo, y mas. Laga nos no lubida cuanto hende awor caba no tin pan riba mesa, y si nos no domina e Covid aki, lo tin hopi mas di nos cu no por cria nan famia. Nos ta domina Covid, o Covid su consecuencianan ta domina nos.