Un di e temanan importante, sigur den tempo di campaña electoral, ta e prijs halto pa energia electrico, y awa. No ta asina dificil pa como partido politico haci e promesa di baha prijs di coriente y awa, pero con realistico esey ta na e momento aki?

Den e ultimo añanan tabatin varios proyecto entama pa gobierno pa purba logra e metanan proponi pa cu suministro di energia na un prijs razonable. Tambe esaki tabata encera e strategia pa deshaci di uso di combustible fosil den produccion di coriente y awa, gradualmente aumentando e porcion di energia cu mester bin di recurso renovable. Desde 2021 a bin particularmente dilanti e proyecto di suministro di gas natural, a traves di e contrato cu e empresa Mericano, Eagle LNG. Tambe a bin e proyecto di hidrogeno, como un componente adicional na e strategia di logra energia renovable pa un gran parti di e produccion di energia local. Un pregunta clave ta: unda nos ta para awe cu e iniciativanan aki?

Proyecto gas natural

Desde e promer contacto na januari 2021 y e firmamento di un convenio cu Eagle LNG na december 2021, apenas a mira avance den e proyecto y esey no tabata un sorpresa pa Bon Dia Aruba. Den un analisis extenso di e situacion di desaroyo di presencia di gas natural liquido den nos region, di 6 di augustus 2021, a duna un resumen bastante deprimente pa un proyecto di gas natural na Aruba.

Nos ta pertenece na un region unda gas natural tin un presencia di mas di 20 aña caba, cu un distribucion bastante desaroya. Esey ta haci e parti di comercialisacion di gas cu cliente den region practicamente no viable, cu consecuencia cu e consumo di gas ta cay completamente pa e clientela local. Y cu un contrato cu ta resulta despues di ta mara Aruba na tuma un cantidad minimo cu mester paga, usa si of no, esaki ta impedi na yega na un prijs faborable pa e consumidor local.

Ademas a bira keto riba e tereno specifico aki. E website di Eagle LNG ta menciona como ultimo suceso e firmamento di un MOU entre Aruba, Eagle LNG y e empresa portuario Jaxport na Florida, na april 2023. Di banda di e firmante pa Aruba, Refineria di Aruba NV, no ta bin ningun noticia al caso. E salida inespera di e ministro cu tabata encarga cu asunto di energia a haci cu na e momento aki no tin claridad kico ta e situacion.

Proyecto di hidrogeno

A surgi e plan tambe pa produccion di hidrogeno (berde) na Aruba, como un componente extra na e intentonan pa logra suministro optimal di energia renovable. Esaki lo a trece posible colaboracion cu e empresa Spaño Acciona, cu ta opera entre otro un proyecto similar na Mallorca. Tambe tabatin contacto cu inversionista Hulandes riba tereno di hidrogeno, pa crea un nucleo di actividad industrial y comercial alrededor di e produccion di hidrogeno.

E proyecto aki tambe a resulta ‘too good to be true’, ya cu e perspectivanan pa un industria viable na Aruba ta bastante improbable. Den un analisis di e situacion di hidrogeno den nos region di 16 di maart 2023 Bon Dia Aruba a constata cu tabatin varios proyecto grandi andando den nos region, entre otro na Colombia y na Trinidad & Tobago, di un escala hopi mayor na e posibilidadnan na Aruba.

Por ehemplo, e proyecto Colombiano ta encera uso di un potencial di entre 1 GW y 3 GW di electricidad pa produccion di hidrogeno, mientras e proyecto na Aruba ta keda bao di 60 MW, cu ta solamente 6% di e capacidad minimo di 1 GW na Colombia. Cu competidor asina grandi den region, Aruba no tin speranza di yega na un escala economico faborable pa bende hidrogeno den exterior.

Ta keda anto e produccion pa uso local, unda mester considera cu hidrogeno den un set up di energia electrico ta sirbi solamente como ‘backup’ rapido pa reemplaza otro recurso den caso di emergencia. Si ta pa uso directo, ta mihor pa usa e energia renovable, di biento o solo, directamente envez di usa esaki pa produci hidrogeno. Esaki probablemente no ta duna un perspectiva viable.

Uso di heavy fuel oil (HFO)

Den e situacion actual Aruba lo mester keda usa HFO como combustible principal pa genera electricidad, sin perspectiva pa logra un reemplazo alternativo. Segun International Energy Agency (IEA), e autoridad mundial di petroleo, 2025 ta mustra en principio un mercado bon suministra, loke no ta indica prijs mas halto di crudo. Esaki ta indica por lo pronto no un nivel di prijs mas halto pa HFO tampoco.

Sin embargo, e sucesonan na Europa Oriental, principalmente e guera na Ucrania por percura pa cambio den e aporte di Rusia, un di e mayor productornan mundial, na mercado internacional. Tambe, no tin claridad na e momento aki tocante posibilidad di ‘hedge’ prijs faborable di HFO.

Conclusion

Resumiendo e situacion local, tumando na cuenta tambe cu no tabatin mas avance den produccion di energia solar y di biento, hasta e produccion a cay te bao di 20% di e produccion diario, no tin vista actualmente riba elemento nobo cu por percura pa un prijs mas faborable pa e consumidor local. Indicativo pa esaki ta cu e partido mayoritario di e actual coalicion – MEP – den su plan di gobernacion no ta menciona e proyectonan di gas natural y di hidrogeno. Ta papia solamente di aumenta produccion di energia renovable, sin indicacion con esey mester tuma lugar. Esaki ta ilustra suficientemente e situacion di stancamento actual riba e tereno aki.