Costo di bida antes y awo: Ciudadanonan ta comenta riba e diferencia y efectonan

No ta un secreto cu costo di bida a aumenta drasticamente durante e ultimo añanan, mas ainda pa motibo di e efectonan di e pandemia di COVID-19 rond mundo y sin lubida e guera cu tin andando na Ucrania.

Diferente factor ta afecta costo di bida en general y aki na Aruba e pueblo ta sinti e efectonan aki fuertemente, principalmente pasobra Aruba no tin produccion local y ta depende grandemente di importacion.

Bon Dia Aruba a acerca algun ciudadano pa combersa tocante con nan ta sinti e efectonan di e aumento di costo di bida na Aruba y con nan ta compara esaki cu antes.

M. Molina ta un pensionado di 65 aña di edad cu a yega Aruba for di Venezuela na aña 1993. E ta conta antes bida tabata hopi mas barata compara cu aworaki y e ta recorda cu e tempo ey un paki of caha di 2.5 kilo di pia di galiña tabata costa apenas Awg. 1.80 y a pesar cu tur cos tabata barata, semper tabatin oferta na e diferente supermercadonan e tempo ey.

“Fiesta Trading, Faborito, Certified di antes, no Mega Mall, Pueblo. Esey tabata e supermercadonan unda nos tabata haci compras, bo por a haya tur cos y semper tabatin bon oferta. Cu Awg. 100 of 150, nos tabata yena full un garoshi cu tur cos y tabata dura nos pa henter e luna”, el a bisa

Molina a toca e tema di seguridad, ya cu criminalidad y inseguridad tambe a aumenta drasticamente e ultimo temponan. El a remarca cu antes e isla tabata mas sigur, no tabatin tiroteo, ni tanto criminalidad. “Ami tabata considera Aruba e paraiso riba tera. Awendia bo por sinti mas sigur na Aruba compara cu otro paisnan, pero e cambio ta grandi toch”, el a agrega.

El a señala cu aworaki tin hasta camindanan e no por ni pasa cu auto anochi door cu muchanan ta tira piedra riba auto of un persona no por cana su so mas tampoco den cayanan sin luz anochi sin wordo atraca. El a recorda tambe con antes tabata hopi comun cu un persona ta ofrece lift na cualkier otro hende cu tabata nato di caminda, pero aworaki ya esey no ta posibel mas, e peliger of miedo pa wordo atraca ta grandi.

Un aña prome cu e pandemia di COVID-19 a yega mundo pa bolter e di pia te cabes, Molina a cuminsa cobra su pensioen di biehes. E cantidad cu e ta cobra no ta completo teniendo na cuenta e añanan cu e no tabata na Aruba, pero el a indica cu prome cu e pandemia a cuminsa e cantidad cu e ta cobra tabata yega pa e cosnan necesario, manera cuminda, gasolin y tur e otro necesidadnan basico.

Pero awendia, despues di COVID-19, el a splica cu su pensioen no ta ni yega pa e necesidadnan basico mas y ta imposibel pa sobrevivi cu su pensioen solamente.

“Costo di bida ta carisimo. Aworaki cu 100 florin bo por cumpra apenas cuater, cinco cos na supermercado. No ta manera antes cu mi tabata bay Fiesta Trading y yena un garoshi cu 100 florin”, el a comenta.

Reportero di Bon Dia Aruba a puntra Molina su opinion ariba e anuncio di aumento di tarifa di awa. Un aumento cu a wordo anuncia y despues a wordo cancela, pero un aumento cu toch lo wordo ehecuta den futuro cercano. Molina a expresa: “Otro aumento mas cu e pueblo mester carga. Placa apenas ta yega pa sobrevivi, y aworaki nos mester bay soporta otro aumento. Tur cos ta aumenta menos e placa cu pueblo ta haya, sea salario of pensioen”.

Otro ciudadano cu reportero di Bon Dia Aruba a combersa cune ta F. Montilla, ken desde 2010 ta traha riba su mes cu su propio compania. El a conta cu den su bista prijs di material a aumenta cu casi 200%.

El a duna como ehempel cu antes, ora cu el a cuminsa cu e compania, un switch tabata alrededor di Awg. 1.75, dos aña pasa e mesun switch ey tabata costa Awg. 6, pero aworaki, e ultimo dos añanan el a indica, e aumento ta desproporcional pa motibo di e efectonan di e pandemia y e guera na Ucrania.

“Un luna pasa un kabel cu ami ta cumpra pa traha tabata costa Awg. 14 pa meter, y awe mi a pasa puntra pa e mesun kabel ey e prijs ta Awg. 17,50. Esey ta djis den un luna. Y tur local tin di haber cu e material koper ta pio ainda pasobra koper a subi hopi mas”, Montilla a comenta.

Pa loke ta den e aspecto personal ta mescos, el a bisa, pasobra antes cu mas o menos Awg. 200 e por cumpra, y hasta mas cos, pa full su famia pa henter e luna, pero aworaki costo di bida a aumenta hopi mas den tur aspecto.

“Antes cu Awg. 80 di gasolin mi por a core trankilamente pa cinco dia. Aworaki cu Awg. 200 di gasolin mi ta core cuater dia. Apart cu e gasolin ta mas caro cada dia, e ta dura menos”, Montilla a subraya.

El a agrega manera cos ta mustra costo di bida lo sigui aumenta y cu incluso prijs di dollar ta aumentando na tur e paisnan Latino Americano, locual el a comenta tin su efecto pa Aruba ya cu Aruba ta ricibi hopi fruta, berdura y otro cosnan for di paisnan Latino Americano.

“Riba ken tur e peso di e aumentonan aki ta cay? Riba e pueblo. Mi no sa con nos ta bay haci pa sobrevivi cu tur e aumentonan aki”, Montilla a finalisa.