Costa Rica: Problema financiero reto principal pa tur candidato presidencial

E segun dobuelta di eleccion presidencial dia 1 di april proximo tin menos di un luna pa bay. E campaña te awor ta central alrededor di e aspecto religioso, cu e predicado evangelico Fabricio Alvarado como faborito, pero cu no ta duna solucion pa e time bomb cu ta menasando e modelo di bienestar di Costa Rica: e crecemento acelera di e deficit fiscal y di debe publico, cu e repercusion di credito mas caro y e peligro di destabilisacion di e pais Centro Americano.

Politico, tecnico y expertonan di henter e espectro ideologico ta reconoce e gravedad di e problema di likides di gobierno central mirando e falta di acuerdo politico cu ta permiti cubri e buraco fiscal por medio di corta den subsidionan social o aumento di impuesto. E debe di gobierno central a bira dobel den ultimo 10 aña manera den ningun otro pais Latino Americano y awor ta na 50% di su PIB (GDP). E deficit presupuestario ta iguala esun di e crisis di inicio di añanan 80 y ta anticipa cu fin di 2018 esaki por cera cu alrededor di 7%.

Ora dia di pago ta yegando pa paga e funcionarionan publico tin tension tocante disponibilidad di placa y cada dia cu pasa ta mas caro pa ministerio di Financia pa haya financiamento. E deterioro financiero durante ultimo tres gobiernonan ta bay hunto cu e incertidumbre economico genera pa e di dos buelta di eleccion presidencial. E dos candidatonan cu ta topa otro ta e predicado Fabricio Alvarado, un principiante, mescos su partido, den maneho di gobierno y economia; y Carlos Alvarado, representante di e partido gobernante partido Accion Ciudadana (PAC), cu ta paga parti di e factura pa e deterioro di e situacion financiero publico den e ultimo cuatro aña, a pesar cu economia ta crece cerca di 4%, un ritmo superior na e promedio Latino Americano, y ademas ta presenta un inflacion modera (2,6%).

“Si esun gana of e otro, nos ta na borde di mira e problema fiscal explota cu a acumula den e ultimo 20 aña”, e economista Fernando Rodriguez ta señala, ken te na december pasa tabata vice ministro di Financia den un gobierno cu mester a aplica reduccion di prestacionnan social cu e ta califica como “doloroso pero necesario.”

Desde 2008 e debe gubernamental a resulta imparabel. Di 24% di PIB e ta awor na 49%. Aunke ta menos cu esun di Brasil, El Salvador, Uruguay, Argentina o Mexico, den ningun otro pais el a crece asina rapido.