Gobierno di presidente Carlos Alvarado a lansa na inicio di e siman aki un plan pa elimina e uso di combustibel fosil pa aña 2050, cu cual e nacion Centroamericano ta aspira di ta entre e promenan na mundo di elimina emision di carbono.
Ta trata di un ruta di 10 punto cu ta trata di genera un modelo di desaroyo, basa riba reduccion di emision di carbono den atmosfera, digitalisacion y descentralisacion di produccion energetico.
E puntonan mas destaca di e iniciativa, oficialmente denomina Plan Nacional di Descarbonisacion, ta inclui transporte y mobilidad sostenibel, energia, construccion sostenibel y industria, maneho integral di residuo, agricultura y cambio y uso di suelo.
Si cumpli cu esaki, Costa Rica lo por logra di tin “cero emision neto” aki 31 aña, loke ta traduci su mes den no emiti mas carbono cu locual por compensa a traves di conservacion y sembra di reserva forestal.
“Descarbonisacion no ta un moda, sino un necesidad,” Alvarado a afirma durante presentacion di e plan, cu cual el a considera cu su pais por bira un ehempel pa otro nacion.
Costa Rica ta pionero cu su politica ambientalista na America Latino. E nacion Centroamericano, cu a bira conoci pa motibo di no tin ehercito desde 1948, a renoba su constitucion na 1994 pa inclui e derecho di un ambiente saludabel pa su ciudadanonan.
