Cosnan cu no a cambia den ocho aña

Ayera mainta hopi hogar na Aruba a ricibi via post un algo entre un magazine y un foyeto, cu informacion electoral y cu bo por uza diabierna venidero pa yena resultado di e urnanan, mientras bo ta warda ansiosamente pa e resultado final, perde of gana. E publicacion ta util y nos por supone cu ta e empresa o institucionnan cu ta aparece cu propaganda, lo a haci esaki financieramente posibel. Nos no sa ken ta responsabel pa e totalidad, pasobra no ta bisa esey ningun caminda. Pero bon, laga nos supone cu parcialmente nos placa di belasting lo a bay na esey tambe. Esey lo ta un suma chikito en todo caso, compara cu e biyones, si bo ta lesa bon: biyones no miyones, cu nos a mira desperdicia desde cu nos a bira pais autonomo den Reino.

Pero esey no ta e unico cos cu a capta nos atencion. Nos ta mira entidadnan manera Aruba Investment Bank, fundacion Lotto pa Deporte, Refineria di Aruba NV, y Utilities Aruba NV, cu ta haci propaganda pa nan mes, sosteniendo e publicacion aki tambe, nos mag supone. Nada malo den esey, pero e ta pone nos diripiente pensa riba e cosnan cu nos no a mira cambia den ocho aña. Y si cos bay malo pa nos, aki ocho aña atrobe nos por saca e editorial aki integralmente, sin cambia nada, pasobra nada no a cambia pa hustifica esey. Kico nos ta papiando aki? E hecho cu e entidadnan aki ta haci propaganda con bon nan ta, pero nunca a duna cara cu nan resultadonan financiero. Di Refineria di Aruba NV nos por comprende ainda, pasobra ta poco dia ey nan a lanta, pero e otronan ta presente pa basta aña caba. Pero kico nan tin? Bay riba nan website anto bo ta haya yen di informacion, pero nada di duna cuenta con nan ta para financieramente, publicando nan cifranan anual pa tur hende por mira. Anto mientras cu tur ta cay den e famoso categoria di nos e ta. Loke ta haci cu, pensando e cos aki bon, cu nos ta doño anto di un monton di secreto di estado. Y ta ken a declara e cosnan aki secreto di estado? Partido geel, partido berde? Of ta nan mes a dicidi cu nan ta?

Naturalmente nos sa pakico nan no ta publica, simplemente pasobra nan tin prohibi pa e ministro responsabel pa publica cualkier cos cu ta bay den direccion di duna cuenta. Asina te dia di awe, mescos cu ocho aña pasa, no tin ningun transparencia basico den ningun di e entidadnan aki. Y den esaki tin algun situacion ironico, manera e caso di Utilities Aruba NV, cu tin un subsidiario yama WEB Aruba NV, cu si ta duna su cuenta anual sin faya riba su website, pero e compania madre mes ta nenga redondamente duna esun di nan. Igualmente e otro filial NV Elmar, cu tampoco ta entusiasma pa transparencia. Nan a yega di bay corte cu sindicato pa evita cu e sindicato haya e cuentanan anual pa nan por evalua con corecto e punto di bista di e gerencia ta encuanto posibilidad di mehora salario y condicion secundario. Anto nan a gana e caso tambe! Claro, pasobra hues no por forsa bo practica transparencia, ta bo mes mester mira importancia di esaki.

Pero, talbes ta nos ta kiboca y tin un motibo hopi valido, cu nos no conoce, pa no laga ningun ciudadano mira e documentonan aki. E mester ta algo super special si, pasobra na otro paisnan ta normal pa haya tur e documentonan aki publica riba e respectivo websitenan. Anto e ora lo corecto ta pa haci un pregunta simpel na tur partido politico, pero specialmente partido geel y partido berde, pakico e miedo panico pa ciudadanonan haya sa con ta para cu tur e entidadnan aki, cu supuestamente nos tur como ciudadano tin un parti (chikito) aden. Si pa añanan largo WEB y algun entidad publico manera Banco Central, Camara di Comercio y AZV a publica nan cifranan anual, y nada catastrofico a pasa riba nos isla, kico ta e problema pa habri e asunto aki y obliga tur entidad publico pa trece nan cifranan dilanti?

Mas ainda den e caso di e ministro encarga cu Salubridad Publico y Deporte, unda di un banda AZV tin un publicacion anual ehemplar, di no solamente cifra pero tambe plan y proyeccionnan, anto di otro banda e secreto intolerabel di loke ta pasando den Lotto pa Deporte. E pregunta na e ministro concerni ta anto, ora ta papia transparencia, algo generalmente deseabel, unda e ta para? E ta pro o e ta contra transparencia? Y si despues di eleccion e no ta ministro mas, e pregunta ta keda naturalmente pa su sucesor, di cual partido e ta, no ta importa.

Di e mesun forma aki nos por a papia tambe di e ley (LOB) cu ta regla e derecho di ciudadano pa haya tur documento gubernamental cu no ta secreto di estado, den cuadro di e mesun transparencia tan sagrado. Nada no a drecha. Nos ta papia atrobe aki ocho aña?