Cosnan cu a bay robez… Y cosnan cu ta bay drecha…?

Refineria di Aruba NV a bira, a base di e rapport di e compania di analisis forensico, e ehemplo mas reciente di con deficiente nos companianan estatal ta opera. Sumanan miyonario a keda paga na diferente compania sin cu sikiera tabatin un contrato cu nan. Tus cos ta parce di a bay den comunicacion personal, principalmente cu e director di e compania. Y e no a keda solamente na esey; hasta tabata haci pago na un persona cu tabata liquidando un negoshi y tabata haya pago bao nomber di e otro cu mester a lanta ainda. Tur esey ‘netchi’ regla cu e director, sin molester di papel, simplemente eficientemente palabra cu ‘meneer’. Loke a sucede na RdA NV ta un bon ehemplo di e deterioro di gobernacion en general unda ta parce cu e palabra ‘control’ no ta existi.

Y tur e tempo ey tabatin un hunta di supervision pa cual e refran “tanto bal bo t’ey o lag’i t’ey’ ta completamente aplicable. Segun estatuto di cualkier compania cu tin un hunta di supervision, ta stipula e derecho y debernan di e hunta, cu ta encera practicamente ‘standard’ cu e miembronan di e hunta tin e derecho di drenta den e empresa su instalacionnan y exigi splicacion y hiba cu nan cualkier documento o otro forma (moderno) di portador di informacion, cu nan ta considera necesario pa haci nan trabao. Esaki hustamente pa controla e director(nan) cu ta responsable pa e maneho di e compania. Nos ta duda cu esey a sucede pasobra den henter e rapport no ta bisa nada di esey, aparentemente nan no a papia cu nan. Nos por comprende esey, pasobra aki ta unda nos tin un di e principal problemanan den practicamente tur empresa estatal: e hunta di supervision t’ey mas tanto como ‘cheerleaders’ di e gobierno di turno, y no como hende cu a cuminza cu lesa bon kico ta nan tarea como supervisor. Y pasobra nan ta nombra primeramente pa nan lealtad politico y no pa ‘stroba’ e director(nan) den ehecucion di e maneho cu e mandatario di turno ta desea, nan no ta haci nan trabao.

Kico lo mester sucede pa remedia e tipo di situacion aki? Varios cos. Pa cuminza un gobierno cu ta realmente bay pone tur cos na nan lugar y ta stop cu e nombramento di famia y amigo den board di e empresanan aki, pasobra e unico control cu nan ta hiba ta controla si tur hende ta haci o keda sin haci exactamente loke e ministro di e momento kier. Den e mesun rapport forensico nos por detecta aki aya rasgonan di un pensamento eroneo cu ta existi den practicamente tur empresa estatal. Esey ta cu e ministro responsable y representante di e accionista unico cu yama Pais Aruba, mester ta envolvi den tur cos y ta e ta dirigi e empresa. Ehemplo di esey ta cu den e rapport ta menciona cu “e ministro, den su capacidad di representante di e accionista unico, a nombra e director y e cera e contract cune”. Den un compania cu ta respeta su mes, e accionista unico ta nombra e director pasobra e ta representa henter e asamblea di accionista: e reunion ta nombra, no e accionista. Peor ainda ta si ta e ministro ta firma contrato di trabao cu director; ta e asamblea di accionista ta nombra un persona, cu por ta e mesun director cu nan a caba di nombra, pa bay registra e nombramento. En corto: e ministro no tin nada ta firma den e compania.

Mucho menos mester sucede cu, manera ta e caso bao di e anterior gobierno, cu e ministro ta registra como “opdrachtgever” den e proceso di pago na nomber di e compania. Si na e nivel aki caba bo ta haya e tipo di confusion aki, unda politico den su funcion publico ta bay un stap mas leu y ta cuminza run un compania estatal manera un mero departamento di gobierno, anto no mester keda straño cu mescos e departamentonan e companianan tambe ta yen di nombramento politico, y no den e hunta di supervision so. E corupcion ta bay tambe den direccion di esnan cu a haya contrato, dispensa nos e eror, supuestamente mester a haya un contrato di servicio cu e compania, pero tur cos a keda regla bao man, pasobra ta trata di ‘nos hendenan’.

Nos ta haya cu nos Promer Ministro tin completamente razon ora e ta bisa cu e cosnan aki no por keda asina. Lamentablemente el a cuminza cu un paso falso den e asunto aki, bisando den su carta di introduccion di e rapport na Staten cu e ta spera di nan cu ta bay pensa riba kico ta bay haci pa e cosnan aki no sucede mas. Nos ta kere cu den esaki tin un bunita tarea pa su propio persona. Su propio gobierno tambe a peca riba tereno di nombramento di friends & family den e entidadnan aki, y te awe ainda nos ta tende bunita palabra manera ‘Good Corporate Governance’, pero te awe nos no a mira un pida papel di e famoso Codigo aki. Que hubo di e famoso ‘transparencia’ cu nos ta tende regularmente? Como gobierno nan no mester laga e trabao pa COHO bin haci… Nos mes por, toch…?