Diabierna 04 y diasabra 05 di october tin dos tayer di e artista di Hulanda, Naomi Rosheuvel. Cosecha y Naomi ta organisa e dos tayer cu e intencion pa siña publico loke ta importante den mundo di moda y diseño pero tambe pa por tin intercambio di experiencia y conocemento entre Hulanda y Aruba den e tayer.

Naomi ta un artista cu un carera profesional den moda na Hulanda, unda e ta crea piesanan di moda pero tambe duna tayer pa yuda hendenan pa explora y explora nan parti creativo. E marca di moda di Naomi ta yama Nomi y e ta uno conoci pa su toke bohemio pero tambe colorido.

Diabierna 04 di october, di 17.00 pa 19.00, participantenan di e tayer “Fashion & Branding” lo haya tur e ‘ins and outs’ di moda, branding y diseño di Europa. Naomi mes a cuminsa desaroya su mesun estilo y marca despues di ripara cu e kier haci esaki. E la sigui tayer y busca guia cerca profesionalnan den e ramo di moda y ta siñando tur dia con tin cu sigui desaroya un marca, con ta draai un operacion den mundo di moda, etc. Tambe e participantenan tin e oportunidad pa traha un piesa inspirador unda cu por interpreta loke a sinja den e tayer door di crea un piesa. E prijs pa por participa ta AWG 50.00, incluyendo material y refreshment. Edad pa por participa ta 15 aña bay ariba.

Diasabra 05 di october, di 10.00 pa 14.30, lo tin e di dos tayer di Naomi, e tayer yama “Fashion & Culture”. Akinan e enfoke lo ta riba nos muchanan. Muchanan ta haya guia di e artista pa por crea piesanan alternativo y inspirador. Lo transforma pañanan bieu of cu no ta wordo uza mas den un piesa di moda. Cosecha y Naomi ta pensa cu no por cuminsa trempan suficiente pa inspira nos futuro artistanan. E prijs pa por participa ta AWG 50.00, incluyendo material, refreshment y un light lunch. Edad pa por participa ta 6 aña bay ariba.

Pa tur dos tayer participantenan ta wordo invita pa trece piesanan cu ta inspira nan pa nan por uza den e tayer. Por ehempel por trece un jeans bieu of un camisa cu no ta uza mas.

Inscripcion ta necesario y esaki ta tuma lugar na Cosecha San Nicolas of na Cosecha Oranjestad.

Pa mas informacion por tuma contacto cu Cosecha San Nicolas na telefon 587-8708 of Cosecha Oranjestad na telefon 587-8709. Tambe por manda un email na cosechatayer@gmail.com.

Pa mas informacion pa cu Cosecha, por bishita e Facebook page di Cosecha: www.facebook.com/Aruba-Cosecha.