ORANJESTAD – Cosecha ta un galeria comercial cu ta ofrece y mustra productonan inspira artesania, diseño y patrimonio di Aruba, tur traha na man pa artesano local.

Durante un entrevista cu Joanne Dirksz y Soraida Wever, directora y manager di Cosecha Aruba, nan a splica cu a naci e concepto aki cu ta duna apoyo pa e artesanonan local.

Dirksz a duna di conoce cu Cosecha a cuminsa na augustus di aña 2015 cu e tienda Cosecha Oranjestad prome, fin di november di 2016 a ser habri e tienda Cosecha Aruba na San Nicolas, e idea a nace door di un proceso basta largo.

El a comenta cu prome cu e proyecto a yega pa tiendanan, tur hende cu ta parti di Cosecha Aruba mester tin un seyo. Tur e productonan cu ta ofreci na Cosecha tin un seyo, cual ta nifica cu nan ta productonan cu a wordo certifica na Aruba.

Aruba Cosecha ta cay abou di Fundacion Craft, un fundacion cu ta traha cu artesanonan of artistanan cu tin seyo, tambe el a expresa cu den un futuro cercano, nan lo habri loke ta trata Aruba Cosecha kiosco, na un luga mas cerca di e turistanan, pa nan por bay cu piesanan traha na Aruba.

E artistanan cu ta parti di e tienda mester pasa e proceso di comision di seyo. Tur e productonan mester pasa pa e departamento di cultura pa e comision aki, si un persona tin un piesa cu lo kier certifica, Dirkzs a splica cu e persona mester bay pa departamento di cultura y e comision di seyo ta analisa e piesa, evalua pa sa si e producto ta bon, si lo por bende y esun mas importante, si tin aspecto local y ta traha na Aruba.

E obhetivo di Cosecha Aruba pa ta bende e piesanan di e artesano of artista, e benta di e producto ta completamente pa e artesano, Cosecha Aruba ta ricibi un comision so di e benta, pa motibo cu nan ta un centro di apoyo cu lo ta bende e piesanan.

Cosecha Aruba, segun Dirksz a bisa ta un fundacion cu ta traha pa e artesanonan, e dos parti di e comision ta pa e boluntario cu ta forma parti di e ekipo. E diferencia di e dos tienda ta cu na Oranjestad ta mas un galeria cu ta bende e piesanan, y na San Nicolas e espacio ta hopi mas grandi, y eynan nan ta haci tayer.

Dirksz a expresa cu pa Aruba Cosecha e parti artistico y artesanal ta hopi importante, e meta ta cu e turistanan lo por cumpra e piesanan cu hende local a traha. El a duna di conoce cu e tiendanan a cuminsa cu 25 artesano den tienda, y na e momentonan aki nan tin mas di 60.

Tur e artesanonan ta biba na Arub,a aunke tin algun di nan cu no a nace na Aruba. Dirksz a bisa cu e diferente cultura na Aruba ta hopi importante, pa motibo cu no ta importa si e persona a nace na otro pais, loke ta importante ta cu e persona ta traha piesa cu inspiracion Arubiano.

Di mesun manera, el a expresa cu basicamente Cosecha Aruba ta traha pa e artesano of artista, pa asina nan por duna apoyo pa su productonan por wordo cumpra y mira pa e turistanan of e hende local mes.

Na e momentonan aki, nan tin un proyecto di studiantenan di scol di moda na E.P.B, cu di e manera ey ta expone e pañanan cu e studiantenan ta haci.

Di otro banda, Soraida Wever a comenta cu na Cosecha Aruba ta ofrece tayernan pa hende grandi y pa mucha chikito, igualmente eynan tambe ta ofrece pakete pa e personanan cu tin interes di huur e espacio pa otro actividadnan.

Wever a finalisa bisando cu ‘ta importante pa hende por tuma tempo pa ta mas creativo’, Cosecha Aruba ta pa aporta y duna sosten pa e artesanonan y artistanan cu tin seyo, no na e tiendanan so, sino tambe na e centro creativo unda nan ta brinda pa e personanan por siña mas di loke e arte ta trata.

Durante e entrevista, Bon Dia Aruba tambe a combersa cu Sra Cecilia Morales, Venezolano cu mas di binti aña riba e isla, y el a mustra con e ta traha su artesania cu productonan di reciclahe, asina tambe como santo di lama cu ta duna un toke special pa e piesa.