Cu aña 2019 casi cabando nos ta mirando atras con e aña aki a bay. No solamente den sentido economico pero riba otro tereno importante tambe. Esaki pa un motibo hopi valido. Desaroyo economico riba su mes no ta bisa tur cos. Bo por tin crecemento economico den cifra pero esaki no necesariamente ta bisa den ki direccion e comunidad mes ta desaroyando. Por ehemplo mas crecemento economico no necesariamente ta yega na man, y cartera, di esnan cu mas necesidad. Por ta cu un gran parti di e beneficio economico ta termina den man di individuo y empresa di exterior, di tal manera cu esakinan no ta disponibel pa desaroyo di nos pais. Di otro banda, por tin capital nobo di exterior cu ta drenta, manera ta e caso den un economia habri manera esun di nos, asina ta cu e salida di capital riba su mes no mester ta un drama; tur cos ta depende di yega na ekilibrio.

Kico asina nos a mira durante 2020? Un crecemento leve, bao influencia positivo di turismo, cu sin embargo a desaparece completamente cu e inflacion fuerte cu a cuminsa na 2018. Contal cu tabatin finalmente un crecemento negativo di nos GDP real di -0,7%. Esey caba no tabata bon noticia, pero con e ciudadano comun y coriente a experimenta esaki? Na prome luga el a sinti e prome aña completo di e medida di aumento di BBO/BAZV/BAVP, cu a causa manera tabata anticipa un aumento considerabel den nivel di prijs. Esaki tabatin un efecto serio riba esnan cu e cartera mas plat, cu ta un grupo bastante grandi, cu ta gasta relativamente hopi na necesidadnan basico. Nos a mira recientemente e cifranan di e minimo necesario pa un famia di 4 persona subsisti, cu pa prome biaha a yega na mas di Afl. 5000,- pa luna, casi tres salario minimo. Nos no tin e cifranan definitivo di con e situacion general ta, pero nos mes den sector priva, unda pa hopi empresa e espacio financiero pa haci algo pa nan empleadonan no ta existi, ta sinti cu no tin mehoracion pa e grupo grandi cu no ta dispone di un entrada mas halto cu averahe.

Nos ta comprende tambe e gesto cu gobierno a haci cu reduccion di prijs di coriente recientemente, pa sikiera duna algo di alivio na e consumidor, pero naturalmente loke esaki a entrega na entrada ta hopi mas. Nos no ta bisa esaki den forma di lamento, sabiendo pakico a introduci e aumento grandi aki. A crea debe grandi, y esun cu ta goberna awe, lo mester percura pa paga nan, y esun cu ta paga esaki finalmente, semper ta e ciudadano. Nos ta keda mustra si riba e omision grandi cu tin den e maneho di gobierno, y esey ta cu no tin intencion di baha gasto. Ta keda problematico pa sclama cu tin crisis, anto no ta para e sangramento unda cu e ta. Ora bo lubida di cera cranchi ora bo ta muha mata den bo cura, bo por grita cuanto cu bo kier, pero no ta logico cu bo ta bay cer’e prome?

Sin embargo, nos ta mira solamente mas medida pa aumenta entrada y nada di baha gasto… esaki ta cuminsa parce un ‘disco raya’? Si, e ta. Esey ta implica cu nos mester stop di maha riba e punto aki? Nos por haci esey, pero ken ta beneficia di nos silencio? En todo caso no nos cu ta paga impuesto. Pero poniendo critica un banda, ban purba contesta e pregunta kico mas por haci pa alivia bida di esnan cu tin e entradanan mas abao y ta haya e golpinan mas duro? Atrobe nos mester constata cu nos no ta tende nada mas di e ampliacion di e canasta basico, den direccion di loke e isla ruman Curaçao tin, cu ta un canasta amplio di mas di 50 producto, incluyendo berdura y fruta fresco. Si nan por nos tambe mester por.

Otro asunto pa tuma na consideracion ta gastonan di transporte. No ta asina, manera un gobierno tabata kier pa nos kere, cu tur cos tabata di ‘cinco strea’. Den nos comunidad esnan cu berdaderamente tin e cartera mas bashi, no tin auto dilanti porta… Nan ta depende di transporte publico, cu ta costa hopi mes. Imagina cu bo ta biba na San Nicolas anto bo ta traha na un hotel na Palm Beach. Ta un dineral bo mester pone, di bo salario humilde, pa paga pa yega trabao y yega cas. Nos sa cu inmediatamente ta bin e argumento cu Arubus di mes caba no ta rentable, asina ta cu nan realmente lo mester bay cobra mas ainda? Really? Nos no por cuminsa pensa riba sistema di transporte pagabel? Barata nunca e ta bay bira, pero mester ta posibel pa haci un miho trabao cu loke nos ta haci te awor.

Otro tema urgente ta e necesidad di vivienda pagabel. Riba e tereno aki nos ta mira cierto iniciativa caba di banda gubernamental, pero lo ta bon si por bin mas velocidad den esaki. Tambe esaki lo stimula sector di construccion, loke ta bon pa economia en general tambe. Construccion no mester biba di mas hotel y mall so, tin otro trabao pa haci.