(CuraçaoChronicle) – Waf di Corsou cada bes mas ta keda scogi pa cartelnan internacional di droga como un punto di salida pa manda cantidadnan grandi di cocaina pa Hulanda y otro destinacionnan Europeo. Esaki ta conclui pa revista maritimo Hulandes, De Schuttevaer, basa riba casonan recien den corte na Willemstad. Recientemente, nuebe sospechoso di traficacion di droga a gran escala a ricibi nan huicio eynan.
Segun Team Conhunto di Investigacion (RST), autoridadnan a desenmascara un red bon organisa di actividad criminal, cu implicacionnan significante pa seguridad y integridad di e facilidadnan di waf riba e isla.
E sospechosonan ta acusa di a usa personal corupto di waf pa pone cocaina den containernan destina pa Europa. E balor riba caya di e droga intercepta ta calcula na un minimo di 200 miyon florin. Ministerio Publico (OM) a exigi sentencia di prison variando di 5 pa 15 aña contra e individuonan involucra, dependiendo di nan rol den e operacion.
Un factor importante cu ta haci Corsou atractivo pa actividadnan criminal asina ta e falta di vigilancia maritimo. Pa casi un aña caba, wardacosta no a stacion un barco di patruya riba e isla, permitiendo cartelnan di droga cu boto ‘go-fast’ opera casi sin obstaculo.
Autoridadnan politico Hulandes na Den Haag a indica cu e situacion aki mester cambia pronto. Ta spera cu ta bay manda un barco di patruya back na e region pa patruya Lama Caribe na april of mey, pa pone un stop na traficacion di droga.
