Ora ta papia di corupcion, ta papia di e gran enemigo di un sociedad, di e democracia y di nos Estado di derecho na Aruba, na unda casonan di organisacion criminal den Cocolishi pa labamento di placa, abuso di poder pa bendemento di tereno di pueblo y malversacion di placa di Parlamento di Aruba a pone un mancha scur den e politica Arubiano.
Aruba a yega asina baho den integridad cu hasta un ex-vicepresidente a keda condena pa coy placa di Parlamento pa uso personal, y aworaki tin un parlamentario condena sinta den Parlamento di Aruba manera nada no a pasa. Pa caba di pone e cherry riba e bolo, corupcion di e politiconan di Aruba a crusa frontera y yega Hulanda, unda cu ex-minister plenipotenciario Guilfred Besaril a malversa placa di Pais Aruba durante biahenan di negoshi, a emiti ordennan di pago cu beneficio personal y a realisa gastonan innecesario a costo di Pais Aruba, caminda a comete e eror di no haci un control di factura.
Recientemente, por mira cu e caso Kwihi ta den opinion publico un biaha mas, despues cu dos sospechoso a keda deteni dia 22 di januari ultimo relaciona cu e investigacion di e caso aki. Un di nan anteriormente tabata deteni na november di aña 2023 y tabatin hopi expectativa den comunidad pa e caso aki, mirando cu atrobe un ex-minister ta involucra den un presunto caso di corupcion.
E investigacion Kwihi ta un investigacion tocante acuerdonan di servicionan (dienstverleningsovereenkomsten) den e periodo 2017-2021, cu a ser cera dor di ex-minister Transporte, Comunicacion y Sector Primario, Chris Romero, cu varios persona huridico (rechtspersonen).
Ministerio Publico a informa cu nan ta sospecha di diferente persona,entre nan e persona di inicialnan E.M.G.K, ken a keda deteni pa prome biaha dia 22 di november 2023 y oranan despues a haya su libertad back pa motibo di circunstancianan personal segun Ministerio Publico mes a sigura, E.M.G.K supuestamente di manera fraudulento lo a ricibi placa di Pais Aruba via e construccion aki, e ta amigo y alabes a fungi como coordinador di e ex-minister durante su mandato.
E investigacion di e caso aki a cuminsa na februari di aña 2021 cu huiszoekingnan na varios adres, durante cual a confisca entre otro, cargadornan di data y administracion.
Pa dia 22 di januari ultimo bolbe a detene E.M.G.K., pero e biaha aki hunto cu un otro persona mas, su casa di inicialnan M.S.M ken pa 31 di januari hues-comisario a duna ordo pa alarga nan detencion preventivo den e investigacion Kwihi.
Na mes momento hues-comisario a dicidi tambe cu e detencion preventivo no ta bay ser ehecuta semper y cuando e sospechosonan tene nan mes na condicionnan, un di e condicionnan aki ta cu e sospechosonan mester meld nan mes na momento cu nan ta ser yama pa interogacion.
Ministerio Publico ta mandando un señal fuerte
Landsrecherche di Aruba, cu ta traha independientemente y bao autoridad di ProcuradorGeneral, ta investiga desde 1993 comportacion posiblemente castigabel di (semi) ambtenaarnan. Un parti importante di e tarea aki ta pa bringa corupcion. Corupcion ta ataca un pilar importante di democracia, esta, e confianza den gobierno. Un ciudadano mester por confia cu ta trata cuidadosamente cu placa publico. Un ciudadano mester sa cu ley ta conta pa un y tur y cu corupcion ta inaceptabel.
Politiconan condena pa corupcion na Aruba
Aruba tin record den reino di politiconan condena pa hechonan castigabel, incluyendo ex-minister di Finanzas, Tico Croes bao di gabinete di Henny Eman III pa loke tabata trata Fondo di Desaroyo Nobo San Nicolas su sentencia (onherroepelijk).
Ex-minister Paul Croes, cu tabata minister di Hubentud, Asuntonan Social y Labor den Gabinete Mike Eman II, tambe a keda condena penalmente den e caso IBIS pa diferente delito manera labamento di placa, participacion den un organisacion criminal, acepta y pidi soborno y abuso di su funcion. Paul Croes su sentencia ta tambe ta onherroepelijk y na e momentonan aki ta pagando su debe cu husticia di Aruba na KIA.
Benny Sevinger, parlamentario y ex-minister di Infrastructura, Integracion y Medio Ambiente den Gabinete Mike Eman I y II, ken a keda condena den corte di prome instancia den e caso Avestruz pa otorgamento di tereno di gobierno y mal uso di su fundacion Curason Berde, su sentencia ta den apelacion.
Alan Howell, ken tabata e sospechoso principal di e caso Diamante y tabata fungi como vice-presidente di Parlamento di Aruba, tambe a keda condena pa malversacion di fondo y falsificacion di documento. Aworaki su sentencia ta den apelacion.
Jacqueline van Putten ken tabata politico riba lista y tabata tesorera di e fundacion di fraccion di partido POR den Parlamento di Aruba, cu ta yama Blue is Love Foundation, den sentencia ta indica cu Van Putten a enrikece su mes cu Sinterklaas bonus cu e no tabatin derecho riba dje. Van putten no a apela su sentencia, loke ta haci’e onherroepelijk.
Politiconan sospechoso di husticia na e momentonan aki
Ex-minister di Infrastructura y Medio Ambiente di Gabinete Wever-Croes I, Otmar Oduber, na momentonan aki ta sospechoso den caso Flamingo relaciona cu otorgamento di tereno.
Chris Romero, ex-minister di Transporte y Sector Primario di Gabinete Wever-Croes I, tambe ta sospechoso penal den e caso Kwihi pa algun contract di servicio otorga den su funcion como minister.
Guilfred Besaril, ex-minister plenipotenciario di Gabinete Wever-Croes II na Hulanda, contra ken segun prome minister ya caba un keho penal ta canando su caminda. Cu esaki por mira cu no ta dos minister so cu condena penalmente, manera prome minister a sigura.
Nota di redaccion:
Na Aruba: Na e momento aki tin 4 politico condena penal pa corupcion.
Na Corsou: Tin 2 politico condena pa corupcion y 1 pa asesinato di Helmin Wiels.
Na Sint Maarten: Tin 2 condena na e momento aki pa corupcion.
Partido AVP: Na e momento aki tin 3 condena pa corupcion.
Partido POR: Na e momento aki tin 2 politico condena pa corupcion y 1 sospechoso di husticia na e momento aki den caso Flamingo.
Partido MEP: Tin 2 sospechoso di husticia na e momento aki, un cu ta den caso Kwihi e ex-minister Chris Romero y ex-minister plenipotenciario Guilfred Besaril den e caso Tulipan.
