Corte den Prome Instancia di Aruba a duna su decision riba e solicitud pa un amienda na un medida interino anteriormente imponi durante e proceduranan sumario di fundacion Aruba Birdlife Conservation (ABC), cu mediante nan abogado, mr. G.W. Rep a entrega contra Natura Development NV, representa pa abogadonan mr. R.A. Wix y mr. G.F. Croes.
Segun e sentencia di corte, dia 23 di juni ultimo ABC a entrega un procedura sumario contra Natura na e registro di e corte. Bao solicitud di ABC, e dia aki Corte a impone un medida interino, conoci na e partidonan, riba Natura, efectivo for di e fecha aki te na momento cu duna un veredicto den e procedura menciona.
E audiencia oral den e procedura sumario a tuma lugar ayera, y despues di esaki Corte a programa e caso pa ser trata no mas laat cu dia 2 di augustus proximo. Durante e audiencia aki, ABC a solicita un aumento riba e castigo imponi, mara na e medida interino, di Afl. 500mil pa un miyon florin. Natura a solicita pa rechasa e peticion aki.
Basa riba e procedura durante e audiencia, Corte a duna rason na ABC y a dicidi pa concede nan peticion. E Corte, dunando veredicto riba e solicitud pa un amienda riba un medida interino imponi anteriormente, a aumenta e castigo mara na e medida interino imponi riba Natura for di mita miyon Florin na un miyon florin, segun veredicto di hues mr. A.H.M. van de Leur ayera.
Manera Bon Dia Aruba a reporta, diabierna 23 di juni mainta, ABC a solicita hues pa stop e proyecto di Embassy Suites te ora cu corte duna su decision si e desaroyo ta legal of no. Esaki teniendo na cuenta cu e durante construccion, a destrui un cantidad di mata di mangel y otro matanan protegi, cual ta contra ley di Aruba. ABC a provee evidencia den forma di potret y video pa sostene nan acusacion. Abogado di ABC, Geert Rep a bay hues pa haya un orden di corte pa stop e construccion, y e solicitud aki a keda honra pa hues, segun ABC a splica. Asina a duna e constructor e orden di hues pa stop e proyecto te proximo aviso.
