Corte ta aproba contract di submarino di 5.6 biyon euro entre Hulanda cu Francia

(NLTimes) – Gobierno di Hulanda por ordena cuater submarino nobo di e compania Frances Naval den un contract cu ta envolve 5.6 biyon euro, e corte na Den Haag a indica den su veredicto diaranson den un caso cu un competidor Aleman a trece dilanti.

E submarinonan actual di Hulanda ya caba mester di un reemplaso y actualisacion. E Ministerio di Defensa kier cumpra cuater submarino nobo di e compania constructor di barco Frances Naval.

Un otro candidato, e Aleman ThyssenKrupp Marine Systems, tabata hopi descontento cu a perde e oferta y pesey a hiba un caso corte. Pero corte a declara cu e obhecionnan di ThyssenKrupp no ta valido, concluyendo cu e gobierno no a ignora e oferta di e compania Aleman di un manera inhusto.

Parti di e Tweede Kamer, e camara abou di e parlamento di Hulanda, tabata tambe hopi malcontento cu e decision pa scoge e compania Frances Naval, NU.nl ta reporta. E partidonan PVV, VVD y SGP a haya cu e lo ta un idea terible pa e marina di Hulanda cumpra su submarinonan for di un compania stranhero. Nan ta prefera pa un compania di barco di Hulanda tuma un papel mas grandi den e compra pa mantene conocemento importante den Hulanda.

E compania di Gorinchem, Damen Shipyards, a entrega un oferta hunto cu e grupo Sueco Saab, pero a perde contra Naval. Coincidentemente, Naval ta colabora cu e Compania Real IHC di Hulanda di Kinderdijk. Pero e criticonan ta haya cu e papel di e negoshi di Hulanda ta demasiado limita.