Sala di Instruccion di Supremo Corte di Husticia di Colombia a dicidi impone detencion domiciliario contra e ex-presidente y senador actual Álvaro Uribe pa e presunto delitonan di soborno y fraude procesal, segun un fuente di e tribunal maximo a confirma.
Ta pa un caso cu ta sigui contra e ex-mandatario pa supuesto manipulacion di testigonan. Uribe semper a nenga e cargonan.
“E privacion di mi libertad ta causa un tristesa profundo pa mi señora, pa mi famia y pa e Colombianonan cu ainda ta kere cu mi a haci algo bon pa e patria”, Uribe a skirbi na su cuenta di Twitter.
E presidente Iván Duque a bisa: “Mi ta y mi lo ta semper un creyente den inocencia y honor pa ken cu su ehempel a gana un luga den historia di Colombia”.
E caso di manipulacion di testigonan di e ex-presidente Uribe, di e oficialista Centro Democratico, por resumi cu un denunciante cu a termina denuncia. Uribe a denuncia hudicialmente e senador Ivan Cepeda, di e partido opositor Polo Democratico, na momento cu a sigura cu tabata ofrece beneficionan huridico pa varios ex-paramilitar deteni cu tabata vincul’e cu e gruponan arma aki di derecha extremo.
