Diahuebs ultimo Corte Supremo di Brasil a acredita cu mayoria amplio cu e vacuna contra covid-19 lo ta obligatorio na e pais y a permiti estadonan y municipio lo por impone sancion pa esunnan cu no kier cumpli cu esaki.
E fayo di halto tribunal, forma pa diesun magistrado, no ta nifica, sinembargo, cu e poblacion lo mester vacuna bao forsa, pero ta habri e porta pa cu autoridadnan di e pais lo adopta “medidanan indirecto” pa fomenta inmunisacion.
E decision ta bay den contra di opinion di presidente Jair Bolsonaro, ken a adelanta cu no lo tuma ningun vacuna contra coronavirus y diahuebs a informa riba su rednan social cu di su banda, “no lo obliga ningun hende”.
“Mi no ta bay obliga bo pa tuma e vacuna pasobra a mi ta responsabel,”, e mandatario a sigura.
Brasil ta un di e paisnan cu mas a wordo castiga pa via di pandemia, hunto cu Merca y India, te diahuebs tabata conta 7.1 miyon contagio y cerca di 185.000 morto relaciona cu e nobo coronavirus.
Cu 10 voto contra 1, Supremo a autorisa e gobiernonan regional y municipal pa por castiga e personanan cu lo rechasa di tuma e vacuna anti-covid, cu e prohibicion, por ehemplo, di eherce algun actividadnan of nenga algun beneficionan social.
Sinembargo, Bolsonaro a considera cu Supremo “no tabatin mester” pronuncia su mes riba e asunto aki, na su huicio, a wordo tuma un medida hopi lihe.
Den un acto oficial, prome cu su aparicion riba rednan social, e hefe di Estado a insisti cu tuma e vacuna “ta responsabilidad” di cada ken pasobra “nos ta den democracia”.
