(EFE) – Un hues di Corte Supremo a ordena traspaso di 18.3 miyon real (3.3 miyon dollar) for di cuentanan blokia di X y Starlink, companianan propiedad di Elon Musk, pa e caha di Estado di Brasil, segun Corte a informa diabierna ultimo.
E decision a ser tuma pa hues Alexandre de Moraes, instructor di un proceso penal grandi contra e publicacion di noticianan falso riba rednan social, den cual e magnate Sur Africano ta aparece den un investigacion.
De Moraes a dicta e transferencia di e balornan aki como “pago completo” di e multanan imponi riba institutonan democratico di e red social cu informacion falso.
E sentencia ta di diaranson siman pasa, pero Corte Supremo solamente a divulga esaki diabierna, un dia despues cu e banconan -Itaú y Citibank- den cual X y Starlink tabatin e placa confisca, a informa cu nan a haci e transferencia pa e caha di Estado di Brazil .
Unabes cu e decision a keda ehecuta, De Moraes a kita e embargo cu tabata pisa riba e “cuentanan bancario y activonan” di tur dos compania “mesora.”
E balornan aki anteriormente a ser blokia pa e decision di De Moraes pa enfrenta e multanan imponi riba plataforma “X” “pa no kita” profielnan sospechoso, “ademas di a retira nan representantenan legal na Brazil, loke a conduci na e suspension di operacion” di e plataforma.
Algun di e profielnan aki ta pertenece na bloggernan y voceronan di extrema derecha lidera pa ex presidente Jair Bolsonaro, entre 2019 y 2022, tambe investiga pa plama noticia falso, ataca institucionnan democratico y conspira pa realisa un golpi di estado.
Despues, De Moraes a hustifica e confiscacion di cuentanan di Starlink “pa responsabilidad conhunto” door di considera e companianan di Musk como “un grupo economico de facto,” un argumento cu a ricibi critica di parti di e mundo huridico.
E pelea entre De Moraes y Musk a cuminsa lunanan pasa y a mobilisa e partidarionan di Bolsonaro.
E decision di e hues Brasileño a alimenta e debate riba libertad di expresion y e limitenan di rednan social paden y pafo di e pais Sur Americano. E suspension di e plataforma a wordo aplaudi pa iskierda lidera pa presidente Luiz Inácio Lula da Silva y critica pa e oposicion derechista.
Musk y Bolsonaro a yama De Moraes un “dictador”, cu a bira e enemigo number un di e extrema derecha Brasileño.
Di acuerdo cu un encuesta di AtlasIntel di mas cu 1.600 persona entrevista, un mayoria di Brasileñonan (56,5%) a mira un “motivacion politico” den e decision di Moraes y a calcula cu e accionnan di corte riba X “a debilita democracia cu 54, 4%”.
E Dia di Independencia di Brazil, alrededor di 45.000 Brasileño a manifesta riba e Avenida Paulista central na São Paulo pa exigi e retiro di De Moraes, un di e diesun huesnan cu ta forma e Corte Supremo, den un protesta dirigi pa Bolsonaro mes.
