Corte Superior: Cuidadonan di preso tin cu cumpli cu 150 ora di trabao pa comunidad

E caso di e 8 cuidadonan di preso cu a wordo suspendi, di cual na final 6 a wordo retira, a haya un buelta nobo. Nan tin cu cumpli solamente cu 150 ora di trabao pa comunidad y nan ta haya nan trabao bek.

Esaki ta debi cu den Corte Superior a tene cuenta cu e situacion frustrante cu ta reina y ta reinando den KIA, cu a haci cu na juni aña pasa e situacion a escala na cierto momento, cu despues di a mira un colega wordo maltrata severamente pa un preso, e 8 cuidadonan di preso, aki a baha tur nan frustracion riba e detenido.

Corte den prome instancia

E cuidadonan di preso aki, a wordo treci dilanti di hues y hues a duna un condena den Corte di  prome instancia, caminda dos a wordo declara liber y seis a haya castigo riba nan di dos aña y cu cinco aña nan no mag di eherce nan funcion, cu ta nifica un dobel castigo pa nan.

Corte Superior

E caso aki a wordo apela y a wordo pasa pa Corte Superior, caminda tres hues na Corsou, kendenan a atende e caso, a conclui cu den ningun momento no tabata tin tortura di parti di e cuidadonan di preso aki, manera cu e prome hues a indica den Corte den Prome Instancia, ni tampoco no tabata tin caso di maltrato severo. Loke si tabata tin, tabata maltrato, pero cu consecuencianan serio, pero te ey.

Na final, durante dictamento di e veredicto, e tres huesnan a haya cu e castigo imponi na prome instante tabata demasiado halto y a baha esaki cu 150 ora di trabao comunitario pa cada un di e cuidadonan di preso aki. Consecuencia di esaki cu tur esnan cu a wordo sentencia den Corte den Prome Instancia, a haya nan trabao bek.

Segun abogado Chris Lejuez, comentando riba e caso, e huesnan a considera e situacion cu tabata tin e momento ey den KIA, tabata uno cu a haci cu awa a pasa hariña, creando un situacion caminda cu na momento cu e maltrato a sosode cu e colega, kende por cierto mester bay haci un di dos operacion, cu a haci cu  cuidadonan di preso aki a maltrata e detenido den cierto indole cu a manda su persona hospital, sin tene cuenta cu e consecuencia cu tabata tin e momento ey pa nan. Video di e echo a wordo graba y esaki a wordo analisa den corte.

Abogado Lejuez a sigui splica cu e huesnan den nan veredicto a repasa tur e puntonan cu defensa a trece padilanti, particularmente tur a sali na fabor di e sospechosonan, esta e cuidadonan di preso.

Situacion den KIA

E situacion den KIA ta hopi alarmante. Uno hopi peligroso cu nan tin cu traha aden. Uno cu ta obliga di traha 16 ora pa dia constantemente y si no traha e overtimenan aki, ta haya rapport. Uno cu e director a bisa cu e luga ta un bom di tempo. Uno cu rapport tras di rapport a wordo manda aden y nunca nada no a cambia. Uno cu e directiva ta bisa cu nan no por haci nada, pasobra cu no tin placa. Ora cu bay mas halto te na minister, nan ta bisa nan cu no tin placa pa haci e cambionan necesario. Esey ta trece cun’e cu e cuidadonan di preso, segun huesnan di apelacion, ta nan tin cu cuida otro. Loke a pasa e dia ey, ta un di nan a sufri un maltrato severo di un detenido y nan a bay proteha nan mes. Den e situacion di stress cu nan tabata, loke nan a haci tabata, nan no tabata tin algo contra e persona, esta e persona cu a wordo maltrata, cual e huesnan a tuma esey den consideracion. Nan a baha nan frustracion di e situacion malo cu nan tabata aden, riba e persona aki. E frustracion ey ta loke a causa e problema aki e dia ey.

Detenido/victima bek den KIA

E persona cu a agredi e cuidado di preso den KIA, kende a wordo maltrata pa algun colega di e victima, a wordo manda hospital. Pero despues cu el a sali, el a sigui cu su mal mañanan y a cay bek cera den KIA.

Caso cu no a bin dilanti

Sinembargo e cuidado di preso cu e detenido a dal, kibra su nanishi laga su persona tur na sanger, mester a bay opera. Awo e tin cu bay opera un biaha mas. El a haci denuncia na Ministerio Publico. Aunke cu el a duna keho na Ministerio Publico, te dia di awe, e caso ey no a wordo atendi y Ministerio Publico no a hiba e caso aki dilanti di hues, pa wordo trata. Asina ta cu e persona aki, e cuidado di preso a wordo maltrata, cu nanishi kibra, a perde su trabao, e tempo ey. Awo cu boltermento di e caso, posiblemente e por tin un efecto positivo pa e ambtenaar aki, pero esey ta depende awo di e caso di huridico di ambtenaar, segun e abogado, pero mirando cu e no ta atendiendo e caso di e persona aki, e no por a bisa sigur, kico lo bay pasa cun’e te asina leu.