Corte a extende detencion di ex marinier di Merca cu a wordo acusa pa spionahe, kende a keha den corte pa abuso sufri durante custodia.
Paul Whelan a wordo aresta na fin di december den un camber di hotel na e capital di Rusia, unda e tabata atende na un casamento. Su cargo di spionahe por dun’e un 20 aña den prizon na e pais.
Whelan ta nenga tur cargo di spionahe. Segun su abogado a bisa, su cliente a wordo duna un disco duro cu tabatin informacion clasifica, pero cu e mes no tabata consciente di dje. Corte a dicidi di mantene 3 luna mas den prizon.
Segun Whelan a bisa reportero den corte cu e ta wordo menasa y ta sufri abuso y acoso den prizon. “Mi no a baña den dos siman, mi no por feita y mi tin cu corta mi mesun cabey. Esaki ta tecnica tipico di isolacion pa prizonero di guera.”
Andrea Kalan, vocero di embahada Mericano na Moscu, a bisa cu nan ta desapunta cu corte, pasobra no tin ningun ‘evidencia cu el a haci algo malo’.
Activista di derecho, Eva Merkachova, kende ta autorisa pa bishita e prizon di e pais, a bisa un agencia di noticia cu e administracion di prizon no a lag’e papia cu Americano, pasobra nan tabata papia Ingles.
E prizon a informa Merckachova y otro activista cu nan por papia solamente Ruso, y cu e prizon Lefortovo ta prohibi pa laga un traductor certifica drenta. Mikhail Fedetov, president di e conseho presidencial di Rusia pa derecho humano, a bisa cu miembro di nan conseho lo evalua e keho di Whelan.
